İşğal etilgen Qırımnıñ Qarasuvbazar yapma gölüniñ yalısında bir qaç ay evelsi qurulğan çöplük tarlası kenişley. İşğalci akimiyet yerli sakinlerniñ şikâyetlerine emiyet bermey.
Qırımnı işğalden qurtaruv halqara areketiniñ Qırım bölügi #LiberateCrimea bu aqqında haber ettiler.
"İşğalciler raatsız qalmasın ve olarnı diqqatnen nezaret etkenlerini añlasın dep, yerli Ukraina tarafdarı faalciler ukrain bayrağınıñ resimini mında bir direkke astılar. Biz, ruslarnıñ ukrain Qırımımıznı çöplükke çevirgenine susıp baqmaycaqmız", - dep ayttılar faalciler.
Olarnıñ aytqanına köre, Qırımnıñ işğalci ekologiya nazirligi yarımadada tabiatqa qarşı yapılğan "qanunsızlıqlarğa yol bere".
"Atta içtimaiy ağlarnıñ Qırım qısmında bile bu "nazirlikniñ" "işinden" şaqa yapalar", - dep qayd ettiler #LiberateCrimea areketiniñ iştirakçileri.
Hususan, arman ayınıñ 22-nde yerli "ÇKH" Telegram kanalında işğal etilgen Qırımnıñ ekologiya nazirliginiñ "başı" Olga Slavgorodskaya, içtimaiy ağlarda Sudaqta ekologik felâket aqqında yazılar peyda olğan vaqıtta, onıñ fitnes treninglerinden fotolar paylaşqanını tenqit ettiler.
"Fitnes nazirligi ekologik meselelerni içtimaiy ağlardan ögrene", - dep qoştılar haberde ve Sudaqta deñiz yanındaki çöplükniñ ve Slavgorodskaya idman salonınıñ fotoresimlerini derc ettiler.
Telegram ve Facebookta Suspilne Qırım haberlerine abune oluñız
