Mıkolayiv şeerinde, "Azovstal"ğa uçqanda elâk olğan ukrain askeri, 28 yaşındaki Qırımnıñ sakini Oleksandr Klepikovnıñ şerefine soqaqnıñ adını deñiştirdiler.
Onıñ anası Zoya Leonidivna Suspilne Qırımğa bunı bildirdi.
"Bu Oleksandrnıñ dost-qardaşlarınıñ teşebbüsi edi ve Mıkolayivde Oleksandrnıñ namzetligi aqqında cemaat rey berüvi keçirildi. Neticesinde yalıñız 3% qarşı çıqtı, qalğanları ise qoltuttı", — dedi o.
Zoya Leonidivnanıñ sözlerine köre, soqaq şeerniñ tarihiy merkezinde, avtobus stantsiyasından uzaq degil yerleşe. Bu soqaqnen beraber Svâtoslav Aleksandropolskıy soqağı da bar.
"Oğlumnen ğururlanam. Oğlumnı qaytarmaycağım, amma onıñ hatırası öyle qalacaq. Saşa 2022 senesi Mıkolayivni qorçalamaq içün çoq şey yaptı", — dep elâk olğan askerniñ anası ayttı.
Hatırlatamız ki, Baş İstihbarat İdaresiniñ bölükleriniñ erkânında "Borâan" adınen 28 yaşındaki qırımlı serjant Oleksandr Klepikov "Azovstal"ğa helikopter taqımını alıp kete edi. O ve onıñ zenaatdaşları yardımınen yaralanğanlar madencilik zavodından tahliye etildiler.
Suspilne Qırım sportçı, "Tavriya" futbol klubınıñ ultrası ve İtibar İnqilâbı devrinde ukrain taraflı mitinglerniñ faal iştirakçisiniñ ikâyesini añlattı.
Telegram ve Facebookta Suspilne Qırım haberlerine abune oluñız
