İşğalden azat etilecek Qırım içün memuriy yedekke memurlarnıñ Ukraina tamır halqlarından biri — qırımtatarlar tilini bilgenleri aqqında şeadetname olması içün qırımtatar tili kursını keçmek şartı qoyula bilir. Bundan da ğayrı, yarımadanıñ kelecekteki idarecileri çalışmağa ketecekleri bölgeler aqqında bilsinler dep, olar Qırım tarihı imtianını bermege isteyler.
Böyle fikirni Qırımtatar Milliy Meclisiniñ reisiniñ birinci muavini, sabıq siyasiy mabüs Nariman Celâl "Başlanğıçtan" adlı Suspilneniñ leyhasınıñ ekinci sezonınıñ birinci bölüginde bildirdi
"Menimce, şimdi böyle sert bir şart qoymaq pek qıyın, amma qırımtatar tilinde muayyen kurs keçip, adamnıñ temel şeylerni bilgenini ve bazı suallerge cevap bere bilgenini tasdıqlağan vesiqanı almaq mümkün. İşğalden azat etilecek Qırımda çalışacaq memuriyetniñ belli bir vazifesine isteycek adamnıñ böyle bir şeadetnamesi olsun. Özüm qırımtatar olaraq bunı istegenime baqmadan, sert şartlar er şeyni zorlaştıracaq. Amma men añlayım ki, altın ortasını tapmaq kerek", — dep qayd etti o.
Celâl til kurslarını teşkil etmege ve Qırımnıñ ukrain tarihınen bağlı bir qaç sual qoşulacaq imtian ya da imtian berüv şartını qoymağa teklif ete. O, añlattı ki, insan işke kelecegi bölgeni añlasa, bu devletke de, bu insanğa da, bu topraqnıñ ealisine de fayda ketirir.
"Şimdi bu işnen oğraşmaq içün vaqıtımız bar — arqağa onı qoymayıq, acele meseleler çezilmeli, dep aytılacaq vaqıt siz bu tilni de qoşarsıñız. Şimdi bu işnen oğraşsaq, er şeyni yapmağa vaqıt olur, er kes bahtlı olur, ve o vaqıt işğalden azat etilecek ve serbest olacaq Qırımda yaşayışnı teşkil etüv meselelerine daa çoq diqqat ayırmaq mümkün olur", — dep Meclisniñ vekili qayd etti.
O qoştı ki, Rusiye Qırımnı idare teşkilâtı tarafından öz toprağına çevirgenini kördi.
"Ne içün bunı qullanmaymız, bunı tüşünmeymiz? Başta yüksek pensiyalar, çeşit ödemeler bar edi. Seve-sevmesek de, maliye faktorı insanlarğa pek tesir ete. Menimce, Qırım içün, temsilciliklerden ğayrı, akimiyet organlarını teşkil etmek kerek, Qırım prokurorlığı ve başqa protoorganlar bar. Bunı şekillendirmek kerek, ve insanlar kim ve ne maqsatnen kelecegini añlaycaqlar", — dep Celâl tüşüne.
Arman ayınıñ 18-de Nariman Celâlnıñ intervyusını Suspilne Qırımnıñ YouTube kanalında baqıñız. "Başlanğıçtan"nıñ ekinci sezonı arman ayınıñ 18-den başlap er bazar künü saat 15:30ta çıqacaq.
Alıp barıcı Larısa Voloşına fikir liderleri ve mütehassıslarnen bugün Qırımda ne olğanı, Ukrainanıñ yarımadanı ğayrıdan tiklemege ve onı ğayrıdan integratsiya etmege azır olğanını muzakere etecek. Umumen 12 intervyu planlaştırılğan. Daa soñ leyha, Suspilne Qırım telekanalında da yayınlanacaq.
Telegram ve Facebookta Suspilne Qırım haberlerine abune oluñız
