Aqyarnıñ işğalci gubernatorı Mihail Razvojayev arman ayınıñ 2. gecesi şeerge yapılğan kütleviy ücümni toqtatqanını bildirdi. Bundan da ğayrı, Aqyarnıñ pek çoq soqağında ATACMS raketası ve uçucısız aletlerniñ tüşürilgen parçaları qayd etildi. Birinci malümatqa köre, kimse yaralanmadı.
O, Telegram kanalında bunı bildirdi.
Aynı vaqıtta yerli sakinler Suspilne Qırımğa gece Kezlev ve Saq şeerlerinde patlamalar eşitilgenini bildirdiler.
"Birinci malümatqa köre, endi 4 ava maqsadı urulğan... İlk malümatqa köre, tüşürilgen ava maqsadları maden elementlernen tolu edi", — dep Razvojayev bildirdi.
O, Aqyarnıñ aşağıdaki soqaqlarında viranelerniñ tüşmesini qayd etti:
- General Ostrâkov caddesi — raketanıñ bir qısmı çimenge tüşti, elektrik naqillerini kesip aldı. 218. evden 5 km-ge qadar qısımda ve patlama telükesi olğan er şeyni alıp taşlamaq içün, yolnı saat 12:00-ğa qadar qapatqanlar
- Hrustalöv soqağı — parçaları keçiş noqtasına tüşti;
- Deñiz askerleri soqağı — parçalav ev ö;ünde tüşti;
- Neğlınna soqağı — parçalar, şahsiy evniñ azbarına tüşti;
- Sımonka soqağı — 9-ıncı qatlı evniñ damına raketanıñ parçaları tüşti, o, damnı aştı ve tehnikiy qatında qaldı. Ev sakinleri vaqtınca yerleşüv yerlerine tahliye etildi;
- Pılıpenko soqağı — dronnıñ parçaları evniñ damına tüşti;
- Romanova, Peremoğı ve Ğorpışçenko soqaqları — maden parçalarınıñ tüşmesini bildirdiler;
- Uçuyivka yalısı — "tüşürilgen ava maqsadlarınıñ" parçaları tüşti.
"Operativ ştab, General Ostrâkov caddesindeki ATACMS raketasınıñ parçalarını ve bomba yedeklerini toplav operatsiyası vaqtında telükesizlik tedbirlerini arttırmağa qarar aldı", — dep Razvojayev bildirdi.
Onıñ aytqanına köre, şimdi patlayıcılar viranelerni temizlep toplaylar.
"Pirotehnikler raketanıñ bir qısmını çıqarmaq mümkün olmaycağını añlasalar, onı bütün kerekli telükesizlik tedbirlerinen anda yoq eterler. Yanındaki evlerde yaşağan insanlarğa, evlerini terk etmege kerek olsa, qoşma haber etilir", — dep şeerniñ "gubernatorı" qayd etti.
Şu cümleden, General Ostrâkov caddesiniñ 242, 2-nci korpusı rayonındaki evlerniñ sakinleri, raketa parçamalarını temizlev işleri bitmegence, sokaqqa çıqmamağa rica eteler.
Ukraina Silâlı quvetleriniñ Baş ştabı Aqyarğa ücüm aqqında malümatnı şimdilik resmiy şekilde tefsir etmedi.
Telegram ve Facebookta Suspilne Qırım haberlerine abune oluñız
