Ukrainada ocalar ve tilşınaslarnıñ qırımtatar tilini bilmeleri, ukrain cemiyetiniñ ve memleketniñ medeniy mirasınıñ ayırılmaz parçası olğan Qırımnıñ tamır halqınıñ medeniy mirasını saqlap qalmağa ve inkişaf ettirmege yardım etecek.
Oraq ayınıñ 30. künü Ukraina prezidentiniñ Qırım Muhtar Cumhuriyetindeki temsilciligi Facebookta bunı bildirdi.
Temsilcilikniñ qayd etkenine köre, Nazirler Kabinetiniñ 07.06.2024 senesi 670. qararına binaen, bu tilni saqlap qalmaq ve inkişaf ettirmek pek müimdir, çünki o, Ukraina Milliy azlıqları (toplulıqları) ve tamır halqlarınıñ tilleriniñ ğayıp oluv telükesi altında olğan cedveline kirsetildi.
Prezidentniñ Qırım Muhtar Cumhuriyetindeki temsilciligi, Ukraina tilşınasları ve ocaları qırımtatar tilini bilmeli olğanlarınıñ daa bir qaç sebebini qayd etti:
- qırımtatar tili ve edebiyatınıñ ögretüvi, bu halqnıñ tili ve medeniyetini kelecek nesiller içün saqlamağa yardım etecek;
- tilni bilgen ocalar medeniyetlerarası dialog ve farqlı qavmiy gruppalar arasında añlaşuvnı inkişaf ettire;
- qırımtatar tilşınasları ve ocaları studentler ve talebeler içün qırımtatar tilinde keyfiyetli tasil almaq imkânını temin ete;
- qırımtatar tiliniñ ögretüvi, bu halqnıñ ukrain cemiyetine integratsiyasına yardım ete ve olarnıñ milliy kimligini saqlay;
- Ukrainada medeniy zenginlik, çoq milletlilikni saqlanmağa yardım etecek.
Aynı zamanda, temsilcilik qoştı ki, ukrain studentleriniñ endi eñ az eki Ukraina aliy oquv yurtunda — Taras Şevçenko adına Kıyiv milliy universiteti ve V.İ. Vernadskıy adına Tavriya Milliy universitetinde (2016 senesinden berli Kıyivde buluna) bu tilni ögrenmek imkânı bar.
Telegram ve Facebookta Suspilne Qırım haberlerine abune oluñız
