Vaqtınca işğal etilgen Aqyarda ruslar tantanalı şekilde «Yañı Hersones» müzey-ibadethane kompleksini aziz ettiler. Qapalı merasim devamında haçlı yürüş olıp keçti, anda 12 yepiskop ve 100den çoq ruhaniy iştirak ettiler.
Qırımnıñ işğalli başı Sergey Aksönov öz Telegram kanalında bunı bildirdi.
"Yañı Hersones" müzey-ibadethane kompleksi kelecek nesillerniñ ğururlanacaqları dünya seviyesindeki medeniy obyekttir Eminim ki, kelecekte Vladıka Tihonnıñ ğayretlerinen Aqmescitte Skit Neapolinde böyle formatta bir kompleks yaratılacaq. Böyle leyhalar – bizim tarihiy tamırlarımızğa qaytuv, yaşlarnı terbiyelemek içün ruhiy ve medeniy esastır", — dep qayd etti o.
Qırım.Aqiqatnıñ malümatına köre, merasim vaqtında Hersoneske yollar qapatıldı, yollarnıñ farqlı yerlerinde silânen işğalli polis noqtaları qoyuldı. Vatandaş naqliyatı Hersoneske ketmege yasaqlandı, naqliyatnıñ yolu deñiştirildi.
Oraq ayınıñ 30. künü yerli sakinler "Yañı Hersones"ke kete bilecekler. Elektron nevbet vastasınen evelden yazılıp kirmek mümkün olacaq.
Telegram ve Facebookta Suspilne Qırım haberlerine abune oluñız
