Anomal sıcaqqa baqmadan, işğal etilgen Qırımda kurort mevsimi pek populâr. Lâkin kurort şeerleri boş qala, yerli sakinler ise turistik mevsimniñ muvafaqiyetsizligini bildireler.
Qırım plâjları, esasen yarımadanıñ ğarbiy qısmında, işğalciler tarafından qazıldı. Rusiye askerleri, ukrain askerleriniñ çıqıp ketirmelerinden qorqıp, mudafaa bünyelerini quralar.
Qırımdaki kurort mevsimi muvafaqiyetsiz oldı, dep Ukraina Mudafaa nazirliginiñ Baş istihbarat idaresiniñ vekili Andriy Yusov bildirdi.
Onıñ qayd etkenine köre, Rusiye vatandaşlarınıñ aman-aman 80%-i işğal etilgen Aqyarda bozarğan ayğa satılğan turlardan vazgeçti. Yusovnıñ fikirince, raatlanıcılar yarımadada telüke olğanından qorqalar.
"Bugün işğalli akimiyet, işğalciler içün Qara deñizde telükesiz yerler olmağanı kibi, olar içün de telükesiz yerler Qırımda olmağanını gizlep olamaylar. Adet üzre duşman vatandaş ealisinen, vatandaş obyektlerinen saqlana, bu ise, birden bulunmağa niyetlengen istilâcı devletniñ vatandaşları içün telüke yarata. Buña köre, olar içün anda kurort mevsimi yoq", — dep Bİİniñ vekili qayd etti.
Onıñ sözlerine köre, raatlanıcılar bozarğan ayda Rusiyeniñ Ava mudafaası sisteması Uçkuyevkada ukrain raketasını tüşürgenini alâ daa hatırlaylar. O vaqıt Aqyar şeeriniñ sakinleri, işğalli akimiyetniñ ava telükesi ilân etmegenine şikâyet ete ediler.
Suspilne Qırımğa Yaltadaki şifahaneniñ hadimi añlattı ki, işğalciler raatlanğanlar olmağanı sebebinden zarar köreler.
"Aqyanıñ yalısına raketa parçaları tüşken soñ, raatlanıcılarda kerçekten de qorqu peyda oldı. Çoqusı eşyalarını toplap ketti", — dep qayd etti o.
Aynı zamanda Qırımnıñ işğalli akimiyeti ise, turistlerge Qırımda kerginlik bar, dep işandırdı. Şu cümleden, Rusiye tarafından Qırım köpründeki nevbetler aqqında haber ete.
Prezidentniñ Qırım Muhtar Cumhuriyetindeki daimiy temsilcisiniñ muavini Denıs Çıstikov, qanunsız qurulğan inşaatnıñ nevbetleri suniy, dep işandıra. Ruslar, Qırımğa raatlanmağa kelgenlerniñ sayısını köstermek içün, köpürni qapatalar.
"İçtimaiy ağlarda Rusiye vatandaşları bu teşkerüvlerniñ devam etkeninden şikâyet eteler, olar pek quvetleştirildi. Bundan da ğayrı, köpürniñ bazı yerlerinde tamir işleri alıp barıla ve qullanılacaq yolaqlar qısqartıla", — dep Çıstikov añlattı.
İşğalcilerniñ malümatına köre, tolu miqyaslı istilâdan evel işğal etilgen Qırımda bir senede 9,5 million turist kele edi. 2024 senesi oraq ayınıñ ortasında Rusiye akimiyeti 2 million raatlanıcı aqqında bildire.
Çıstikovnıñ qayd etkenine köre, raatlanğanlar arasında çoqusı bücet saibi, şu cümleden Rusiye askerleriniñ qorantaları bar.
"Olar er vaqıt şifahanelerde bulunalar, tışarı çıqmaylar, çıqsalar da, paralar masraf etilmezler ve bu, inkişaf etmege imkân bermey, bundan evel buña esaslanıp çalışqan kiçik ve orta biznesniñ inkişafına keder ete", — dep Çıstikov qayd etti.
İşğal etilgen Kezevdeki şifahanelerden birinden Suspilne Qırımnıñ menbası da bu malümatnı tasdıqladı.
"Er yerni Rusiyeniñ uzaq bölgelerinden ketken imtiyazcılar aldılar. Şimdi, meselâ, pek çoq kavkazlı ve burât keldi", — dep añlattı o.
Aynı zamanda, turistlerniñ telükesizligine emiyet bermeyip, işğalciler arbiy tehnikasını yerleştireler. Şu cümleden, Qırım partizanları şeer plâjlarında ateş noqtalarınıñ yerleştirilüvini qayd ettiler.
Andriy Yusov qayd etti ki, işğal başlağanından berli kurort faktorı Rusiye Federatsiyası içün prioritet kibi sayılmay edi.
"Qırımnıñ işğal ıntıluvınıñ başından berli iç bir kurort faktorı prioritet olaraq baqılmadı, bu teşviqat, malümat örtü edi. Eñ evelâ Qırım Putinge büyük arbiy baza, büyük arbiy logistika merkezi olaraq kerek", — dep Bİİniñ vekili qayd etti.
Ukraina istihbaratı hatırlattı ki, Qırımdaki Rusiye arbiy obyektleri Ukraina Mudafaa quvetleriniñ qanuniy maqsadıdır ve Rusiye turistlerine yarımadağa barmamağa tevsiye ete.
Telegram ve Facebookta Suspilne Qırım haberlerine abune oluñız
