Poloniya ükümetiniñ aşağı palatası (Seym), 1944 senesi şura akimiyeti tarafından qırımtatar halqınıñ sürgünligini takbih etken ve onı genotsid olaraq tanığan rezolütsiyanı qabul etti. Poloniya parlamentiniñ 414 mebusı rezolütsiyağa qol tuttı, 16-sı qarşı çıqtı, ekisi ise rey bermedi.
Ukraina Yuqarı Şurasınıñ Gumanitar ve malümat siyaseti eyyetiniñ medeniy siyaset meseleleri bölüginiñ başı Mıkola Knâjıtskıy Facebook saifesinde bu aqqında haber berdi.
Onıñ qayd etkenine köre, bu cinayetni tanımağa Baltiya ülkeleri qoşuldılar, bir ay evelsi ise Avropa Şurasınıñ Parlament assambleyası qırımtatarlarnıñ sürgünligini genotsid olaraq tanımağa çağırdı.
"Bugün ise Poloniya Seymi bunıñnen bağlı müim bir qarar qabul etti. Poloniyanıñ tış işleri eyyetiniñ yolbaşçısı, tarihçı ve siyasetçi Pavel Kovalğa teşekkürler bildirem. O, bu qararnıñ Ukraina içün ne içün müim olğanını pek yahşı añlay. Qırımtatar halqınıñ aqlarını bütün dünyanen birlikte qorçalamaq kerekmiz. Qararnıñ qabul etilüvinen de qırım zenaatdaşlarım Ahtem Çiygöz ve Refat Çubarovnı hayırlayım", — dep mebus yazdı.
"Qırımtatarlarğa qarşı yapılğan genotsid fedalarını añma" rezolütsiyasında, Şura Birliginiñ akimiyeti 1944 senesi mayısnıñ 18-nde qırımtatarlarnıñ Qırımdan sürgün etilmesini başlağanı qayd etile. Üç kün içinde yük vagonlarına tahminen 200 biñ insan yüklendi, olarnı insaniyetsiz şaraitte Orta Asiya ve Sibirge alıp kettiler, 8 biñ qırımtatar yolda elâk oldı, daa 45-ı ise kelgen soñ elâk oldı. Bundan soñ 1980 seneleriniñ soñunda qırımtatarlar Qırımğa keri qaytqanına qadar şura akimiyeti yarımadanıñ qırımtatar mirasını muntazam olaraq yoq ete edi.
"2014 senesi Qırımnıñ işğali, Rusiyeniñ Ukrainağa qarşı cenkiniñ birinci adımlarından biri edi. Bu, topraq bütünliginiñ printsipiniñ bozulması, halqara uquq ve BMTnıñ nizamnamesiniñ ciddiy bozulmasıdır. Ukraina toprağında genotsid cinayetini takbih etüv aqqında Poloniya Seyminiñ 2022 senesi çiçek ayındaki qararına diqqat ayırıp, Rusiye ordusınıñ Ukraina vatandaşlarına qarşı muntazam ve yahşı planlaştırılğan zorbalığınıñ genotsid alâmetleri bar olğanını qayd etemiz", — dep polon rezolütsiyasında qayd etildi.
Bundan ğayrı, Poloniya Seymi dünyanı "Rusiyeniñ Ukrainağa qarşı tarikke oğratılmağan, qanunsız, tolu miqyaslı silâlı tecavuzını" takbih etti ve tecavuz içün Kreml akimiyetini mesüliyetke çekmege ve qabaatlılarnı Gaagadaki Halqara makemege çekmege çağırdı.
Bundan da başqa, rezolütsiyada qayd etildi ki, 2014 senesinden başlap işğalciler qırımtatarlarnı muntazam tarzda taqip eteler, 2016 senesi ise yarımadada Qırımtatar Milliy Meclisiniñ faaliyetini yasaq ettiler. Bu halqnıñ onlarnen temsilcisi vatanından sürgün etildi ve daa çoq temsili Rusiye apishanelerinde qapatıldı.
Telegram ve Facebookta Suspilne Qırım haberlerine abune oluñız
