Qırımnıñ Qarasuvbaza rayonından kelgen ve "Hizb ut-Tahrir"niñ Qarasuvbazar gruppasınıñ davası çerçivesinde 17 senege maküm etilgen müezzin Ayder Capparov, Arhangelsk vilâyetiniñ Korâjma şeerindeki 5. müstemlekege etap etildi.
Onıñ apayı Marharıta Caparova "Qırım birdemligi"ne bunı añlattı.
Keçenlerde Çelâbinsk vilâyetibiñ Verhnöuralsk apishanesinde ceza müddetini keçirgen siyasiy mabüs, üç sene apishanede keçirecek edi. Lâkin, Ayderniñ apayı Marharıtanıñ sözlerine köre, 2022 senesi bozarğan ayda apishaneniñ müdiri onı qabul etmege red etti, çünki bundan evel siyasiy mabüs üç sene SİZOda keçirdi, ve acelen müstemlekege yollanacaq edi. Faqat bu ceryan tek şimdi, eki seneden soñ yapıla
Bu sene kiçik ayda Ayder ve Marharıtanıñ 13 yaşındaki oğlu Abdullah Caparov kanser hastalığından öldi. Siyasiy mabüs, öz oğlunıñ cenazesine kelip olamadı.
"Hizb ut-Tahrir davası"nıñ Qarasuvbazar gruppası aqqında ne bilemiz
2019 senesi bozarğan aynıñ 10. künü Ayder Capar, Enver Ömerov ve onıñ oğlu Riza tutuldı. 2021 senesi qara qış ayında Rostov-na-Donudaki Cenübiy bmlgeniñ arbiy makemesi Enver Ömerovnı Hizb ut-Tahrir terror teşkilâtınıñ teşkil etilmesinde, Riza ve Ayderni iştirak etmesinde qabaatladı. Enver Ömerov 18 senege ve Riza Ömerov 13 senege üküm etildi. Ekisi de cezasınıñ birinci üç senesini apishanede keçirecek ediler.
2022 senesi saban ayınıñ 10-nda Vlasis şeerindeki apellâtsiya arbiy makemesi, birinci makemeniñ ükümini deñiştirmemege qarar aldı. 2023 senesi boş ayda kassatsiya makemesi, Hizb ut-Tahrirniñ Qarasuvbazar gruppasınıñ mabüslerine çıqarılğan ükümni de deñiştirmedi.
Advokatlarnıñ qayd etkenlerine köre, birinci seviyeli makeme ve istinaf makemesinde bu cinaiy davanıñ şaatları "cinayet qanunını bozıp" sorğuğa çekildi — şahsiyetleri sebepsiz şekilde gizli tutuldı, taqiqat ve qabaatlayıcı tarafı ise bir kere bile bunıñ ne içün kerek olğanını isbatlamadı. Davanıñ iştirakçileri öz taqiplerini "Qırımtatarlarnı milliy ve diniy sebeplerden taqip etüvniñ büyük zıncırında bir zıncır" dep adlandırdılar.
2019 senesi oraq ayınıñ 18-nde Avropa parlamenti Rusiyeni bütün ukrain siyasiy mabüslerini, şu cümleden Qarasuvbazar gruppasınıñ mabüslerini azat etmege çağıruv rezolütsiyasını qabul etti. Ukraina ve Rusiyedeki uquq qorçalayıcılar olarnı siyasiy mabüsler olaraq tanıdı ve olarnıñ alecen azat etilmesini talap etti.
Hizb ut-Tahrir — islâm siyasiy firqasıdır. 2003 senesi Rusiyede bu teşkilât terror teşkilâtı olaraq tanındı, onıñ iştirakçileri taqip etildi. İştirakçilerni "anayasağa qarşı faaliyet"te ve "dünya halifeligini" meydanğa ketirmek ıntıluvında qabaatlaylar. 2014 senesi Qırım işğal etilgen soñ işğalciler öz qanunlarını işğal etilgen Qırımğa da tarqattılar. Qırım musulmanları da Hizb ut-Tahrirge alâqası bar olğanında qabaatlana ve yarımadanıñ işğaline razı olmağan qırımtatarlarğa qarşı basqını arttıra.
Telegram ve Facebookta Suspilne Qırım haberlerine abune oluñız
