Rusiye quvetçileri oraq ayınıñ 4-nde işğal etilgen Qırımnıñ Aqmescit şeerinde eki musulman diniy mektebine barıp, "Rusiyede yasaq etilgen edebiyatnı" taptılar. Bundan soñ olarnı qapattılar. Böyle areketler Rusiye tarafdarı olğan qırımtatar faalcisi Ayvaz Umerovnıñ bildirmesinen yapıldı, o, Rusiye ordusınıñ ücüm bölüginde Ukrainağa qarşı cenkleşe.
Qırımnıñ işğalden azat etilmesi içün oraq ayınıñ 5-nde #LiberateCrimea halqara areketniñ faalcisi Qırım.Aqiqatqa bergen tefsirinde bildirdi.
Onıñ aytqanına köre, Umerov Ukrainada yasaq etilgen "VKontakte" Rusiye içtimaiy ağınıñ saifesinde bu mekteplerniñ "Rusiyege qarşı mefküre yönelişinen" bağlı malümatnen paylaştı ve "bütün quvetçilerge bu yollanıla ve neticeleri bar", — dep qoştı.
Faalci, Qırım işğal etilmeden evel Umerovnıñ Qırımtatar Milliy Meclisiniñ Sudaq bölgesiniñ reisi olmaq istegenine qol tutmağanlarını ayttı. 2014 senesinden soñ adam Ruslan Balbekniñ gruppasına kirdi, "Qırımtatar milliy-medeniy muhtariyeti" Rusiye cemaat teşkilâtınıñ reisi oldı ve Sudaq şeeriniñ işğalli memuriyetiniñ "baş muavini" vazifesini aldı.
"Soñra o ve onıñ qoruyıcısı Qırımnıñ rusi akimiyetiniñ lâyıqsızlığına oğradı ve er şeyni, şu cümleden azatlıqnı coydı. Belli oldı ki, böyle etip, o, özüni cebeden çıqarmaq içün Rusiye mahsus hızmetlerinde yañı qoruıcılarnı tapmağa tırışa", — dep #LiberateCrimea halqara areketiniñ azası tüşüne.
Aynı zamanda, Rusiyeniñ TASS devlet haber agentliginiñ menbası, qapatılğan mektepler "Tavriya müftiyatı" ukrain musulman teşkilâtına ait olğanını iddia ete. O, "Lübnan ecnebiy mefküresine yönelip, islâm müitinde zararlı mefküre tarqatqanını" bildire.
Telegram ve Facebookta Suspilne Qırım haberlerine abune oluñız
