Belçikada oraq ayınıñ 2-nde Qırımtatar bayrağı kününe bağışlanğan "Eki bayraq - bir memleket" tedbiri olıp keçti. Tedbir Belçikadaki Ukraina Elçiligi, Ukrainian Voices RC, Belçikadaki qırımtatar cemiyeti ve Qırımtatar Maaliy Merkezi teşebbüsinen teşkil etildi.
Belçika Qırallığındaki Ukraina Elçiligi Facebookta bu aqqında haber berdi.
Qırımtatar Milliy Meclisiniñ başı Refat Çubarov hayırlav sözüni ayttı. Bundan da ğayrı, "Halqara işbirlik" Umumiy ukrain belediyeler birleşmesiniñ platformasınıñ başı Boğdan Keliçayev de iştirakçilerge muracaat etti.
"Qırımtatar Milliy Meclisiniñ başı Refat Çubarovğa Belçikada Qırımtatar bayrağı kününe bağışlanğan tedbirlerde iştirak etkeni içün minnetdarlığımıznı bildiremiz", - dep haberde bildirildi.
Aynı vaqıtta Belçikada Ukraina işlerinde vaqtınca iş yapqan Nataliya Anoşına çıqışta bulundı.
"Altın tamğanen mavı bayraq - öz tuvğan toprağında yaşamaq aqqı oğrunda küreş, serbestlik oğrunda küreş ve öz-özüni belgilev aqqınıñ timsali. Bu bayraq, Ukraina devletiniñ qorçalayıcıları yanında cebede buluna, bütün qırımtatar halqınıñ küçü ve cesürliginiñ işandırmasıdır", - dep qayd etti o.
Ukraina elçiliginde qayd ettiler ki, tedbir vaqtında Ülviye Seitosmanova halq oyunını icra etti, em de Cemil Karikovnıñ qırımtatar folklorından muzıkalı kompozitsiyaları da çalındı.
Tedbirniñ soñunda er musafir ananeviy qırımtatar qave ve qurabiyeniñ lezetini baqa bildi.
"Qırımtatar bayrağı künü qırımtatar halqınıñ tirenüvi, medeniyeti ve kimligini saqlamaq qararını hatırlata. İnanamız ki, eñ yaqın vaqıtta Ukraina ve qırımtatar bayraqları Ukrainanıñ ayırılmaz qısmı olğan Qırım Muhtar Cumhuriyetinde yerleşecek", - dep qayd ettiler.
Telegram ve Facebookta Suspilne Qırım haberlerine abune oluñız
