Rusiye Hersonesni teşviqat aleti olaraq qullana. İşğalciler anda "vatanperver" tedbirlerini keçireler. Ukraina medeniy mirasınıñ bu obyektini ziyaret etken insan, Rusiye teşviqatınıñ azamiy "dozasını" ala.
Qırım platformasınıñ mütehassıslar ağınıñ vekili, Bölge İnsan aqları merkeziniñ mütehassısı Andriy Lutsık, Qırım platformasınıñ Üçünci halqara forumı çerçivesinde bunı bildirdi, dep Suspilne Qırım mühbiri haber berdi.
"Anda bütün şartlar ve tedbirler öyle yapılğan ki, bu yerni ziyaret etken insan, (rus — muar.) teşviqatqa azamiy derecede oğray. Hersonesniñ faaliyetine baqsañız, bu, büyük qısımnen, teşviqattır. Ukrain medeniy qıymetleri aynı sergilerde "SVO qaramanları"nen beraber taqdim etileler. Vatanperver tedbirleri er vaqıt keçirile, ve bunıñ episi — medeniy miras tedqiqatlarınen oğraşmaq kerek olğan medeniy müessisede ola", — dep mütehassıs añlattı.
O qoştı ki, işğalciler ukrain medeniy mirasını Rusiye teşviqatınıñ menfaatlarında qullanmağa devam eteler, obyektlerni yoq eteler, qanunsız qazma işlerinen oğraşalar.
"Şimdi biz, bu topraqlarnı kontrol etip olamaymız ve olarnıñ (işğalcilerniñ — muar.) faaliyetini toqtatıp olamaymız, amma biz, muqavemet köstere bilemiz. Birincisi — taqiqat, çünki bu halqara cinayetlerdir. Ekinci ölçev — 2019 senesi kirsetilgen sanktsiyalar siyasetidir", — dep Andriy Lutsık qayd etti.
O, sanktsiyalarnıñ birinci paketi endi çalışmay, çünki 3 senege kirsetilgen edi, dep añlattı. Amma şimdi ukrain medeniy mirasını öz menfaatlarında qullanğan Rusiye institutlarına qarşı başqa sıñırlavlar bar. Mütehassısnıñ qayd etkenine köre, işğalcilerniñ bu faaliyeti Rusiye strategik vesiqalarında, ayrıca mudafaa vesiqalarında aks etilgen.
Andriy Lutsık bildirdi ki, şimdi ukrain sanktsiyalar paketinde işğal etilgen topraqlarda Ukraina medeniy mirasını qullanğan aman-aman 40 Rusiye teşkilâtı bar. Onıñ qayd etkenine köre, bu sanktsiyalar siyaseti devam etmek kerek ve onıñ icracıları — 10 seneden berli Ukraina medeniy mirasına qarşı cinayetler yapqan Rusiye atiqiyatçılarına da tarqalmaq kerek.
"Bu insanlarnıñ faaliyetini aydınlatmaq, olarğa qarşı sanktsiyalar qoymaq ve dünyanen işbirliklerini sıñırlamaq kerek", — dep mütehassıs qayd etti.
O qayd etti ki, ecnebiy neşirlerde alâ daa derc etilgen Rusiye ilmiy maqaleleriniñ müellifleri Qırımnıñ medeniy degerliklerini "rus" olaraq qullanalar. Andriy Lutsık şunı da hatırlattı ki, İtaliyada alâ daa Rusiye tarafından işğal etilgen topraqlardan Ukraina medeniy asabalığınıñ obyektleri taqdim etilgen Rusiye Ermitajı ekspozitsiyası çalışa.
"Bu, (Rusiye tarafından — muar.) küreşmegenimiz yımşaq diplomatik tesirdir. Tez areket etmek kerek. Biz bu topraqlarda kontrolnı ğayrıdan tikleycegimizge qadar sanktsiyalar siyaseti, olarnıñ faaliyetini sıñırlay bile", — dep mütehassıs hulâsa çıqardı.
Telegram ve Facebookta Suspilne Qırım haberlerine abune oluñız
