Ukrainada Qırım Muhtar Cumhuriyetiniñ prokurorlığınıñ bölüklerinden biriniñ eski prokurorını maküm etecekler. Onıñ areketleri devlet hainligiUkraina CQniñ 111. maddesiniñ 1. qısmı olaraq tanıla. Madde 15 senege qadar apis cezasını bere.
QMC ve Aqyar şeeriniñ prokurorlığı bu aqqında haber berdi.
Taqiqat, yarımada işğal etilmeden evel qabaatlanğan qadın Qırım Muhtar Cumhuriyetiniñ prokurorlığınıñ bala aqları ve serbestligini qoruv bölüginiñ baş prokurorı vazifesini eda etkenini belgiledi. Amma 2014 senesi Ukraina halqına sadıqlıq antını bozıp, "Qırım Cumhuriyetiniñ prokurorlığınıñ çağına yetmegenler ve gençlerniñ aqlarını qoruv bölüginiñ prokurorı" olaraq çalışıp, Rusiye Federatsiyasınıñ teklifine razı oldı.
“Ukrain qanunlarına qarşı olaraq, qabaatlanğan şahıs yarımadada prokurorlıqnıñ işğalli organlarınıñ faaliyetini temin etip, "Qırım Cumhuriyetiniñ prokurorlığınıñ reberliginiñ" qanunsız emirlerini yerine ketirdi”, - dep bildirildi.
Qayd etilgenine köre, qabaatlanğan qadın öz areketlerinen Rusiye Federatsiyasına ve onıñ vekillerine Ukrainağa qarşı, onıñ suvereniteti ve topraq bütünligine zarar ketirgen, bozuv faaliyetini alıp barmağa yardım etti.
Telegram ve Facebookta Suspilne Qırım haberlerine abune oluñız
