Gaaga strategik tedqiqatlar merkeziniñ talilcileriniñ fikirince, Ukraina yarımadağa qarşı kelecekte yapılacaq ava ücümlerine azırlana. Ğarbiy mütehassıslarnıñ fikirince, Ukraina Rusiyenen cenkni tek işğal etilgen Qırımda yeñip olur.
Business Insider bu aqqında haber berdi.
Talilcilerniñ qayd etkenine köre, al-azırda ukrain askerleri yarımadada Rusiye arbiy donatmalarına qarşı muvafaqiyetli ücümlerni endireler ve duşmannıñ logistikasını yoq eteler, ameliy üstünliklerini temin etmek içün Qırım köprüne ücüm eteler.
Gaaga strategik tedqiqatlar merkeziniñ analitikacısı Frederik Mertensniñ aytqanına köre, Ukraina öz ğayretini yarımadada Rusiye ava mudafaası topraq sistemalarına qarşı yapılğan arbiy areketlerge toplanmağa bağışlay. Bu adım, memleketniñ mudafaa qabiliyetini pekitmek ve ava boşluğında strategik üstünligini temin etmek içün beklenilgen F-16 qırıcılarınıñ kelmesinen bağlıdır.
"Qırım zayıf. Rusiyelerniñ yarımadada areket etmek içün sıñırlı alanı bar. Putinniñ em siyasiy, em de arbiy ceetten ğayıp etecek şeyleri bar. Şunıñ içün, sıñırlanğan qırıcı uçaqlarnıñ sayısı kerçek tesir ete bilir, amma bu yerde ve Qara deñiz üzerinde, Qırımdaki AMS meselesi çezilgen soñ, bu tam olaraq qullanıla bilir", - Mertens qayd etti.
Bundan da ğayrı, Strategik ve halqara tedqiqatlar merkeziniñ Avropa, Rusiye ve Avrasiya programmasınıñ baş ilmiy hadimi Mariya Snegova bildirdi ki, Rusiye Federatsiyasınıñ Qırımnı ğayıp etmege imkânı yoq.
"Bu, Ukrainağa kelecek muzakerelerde Qırım statusınıñ telükesini para olaraq qullanmağa imkân bere", - qayd etti o.
Avropa siyasetiniñ talil merkeziniñ demokratiya meseleleri mütehassı Elina Beketova dedi ki, Ukrainanıñ Qara deñiz ve Qırım üzerinde nezaretini qaytarması ya da bu topraqlarğa yeterli qadar basım yapması, cenkniñ bitmesini köstermey bile.
Tiş siyasiy araştırmalar institutınıñ Avrasiya programmasınıñ ilmiy hadimi Olha Hvostunova emin oldı ki, RFnıñ işğal etilgen Qırımda mağlübiyeti, “tek kösterğiç degil, aşalanuv da olur edi”.
Beketovanıñ fikrine köre, yarımadada ukrain arbiy areketleri yahşı azırlanğanı ve koordinatsiya yapılğanı, yoldaş ve ava istihbaratı şeklinde NATO tarafından desteklengeni sebebinden muvafaqiyetli oldı.
Neşirniñ qayd etkenine köre, Rusiyeniñ Qırım işğali vaqtında ananeviy arbiy-deñiz flotunıñ ğayıp olğanına baqmadan, Ukraina deñiz uçucısız aletleri vastasınen Rusiyeniñ Qara deñiz flotuna muvafaqiyetnen ücüm ete. Bu areketler Ukraina iqtisadiyatı içün kritik olğan Qara deñizden aşayt mallarınıñ berilmesini ğayrıdan tiklemege imkân berdi ve Rusiye flotunı Qırımdaki Aqyar civarında gemilerini pekitmege mecbur etti.
Ukraina Mudafaa nazirligi uzurındaki Baş istihbarat idaresiniñ yolbaşçısı Kırılo Budanov bildirdi ki, arbiy silâlı quvetlerniñ Qırımdaki Rusiye silâlı mudafaa sistemasına yapqan muvafaqiyetli ucümlerinden soñ, işğalciler onı quvetleştirmege qarar aldılar. İşğal etilgen yarımadanıñ topraqlarında S-500 yañı raketa kompleksiniñ parçalarını yerleştirdiler.
Telegram ve Facebookta Suspilne Qırım haberlerine abune oluñız
