İşğal etilgen Qırımdaki "Belbek" arbiy uçaq limanı, Rusiye AAQniñ eñ yahşı ava mudafaası sistemaları içün qapqan ola. İşğalciler olarnı qoyar-qoymaz, Ukraina Mudafaa quvetleri yañı sistemalarğa ateş açalar.
Bozarğan aynıñ 12. künü Forbesniñ maqalesinde bu aqqında haber berdiler.
Qayd etildi ki, mayıs ayınıñ ortasında ukrain ordusı, 10 amerika raketinen işğal etilgen Qırımnıñ Aqyar şeeri yanında yerleşken "Belbek" rus bazasına şiddetli ateş açtı.
Yoldaştan çıqarılğan fotoresimler isbatladılar ki, ATACMSne ücümi yardımınen AMS S-400niñ batareyasınıñ eki uçuruv cihazı ve radarı yoq etildi. Haber berdiler ki, yanındaki arbiy uçaq limanındaki dört arbiy uçağı da raketa ücümi neticesinde bozuldı.
"Belbek ve Aqyar, rus arbiy-ava quvetleri ve Rusiyeniñ Qaradeñiz flotundan qalğanlar içün müim bazalarıdır. Bunıñ içün ruslar, S-400niñ qısımlarını tezce deñiştirdiler, onıñ raketaları 250 milâğa yeter", — maqalede bildirildi.
Qayd etildi ki, bozarğan aynıñ 11. künü Ukraina Mudafaa quvetleri, S-400niñ batareyasına yañıdan ateş açtılar. Belli olmağan silâ, belki M39A1 ATACMS, "Belbek"ke tüşti. Bundan ğayrı, yanındaki ava mudafaası sistemasınıñ eki batareyası zarar kördi — biri S-400 ve biri S-300.
"Ücüm vaqtında eñ az 10 ATACMS raketası qullanılğan, — Ukrain mudafaa srtategiyaları merkezi haber berdi, — rus Ava mudafaası sisteması birini bile tüşürmedi".
Ücüm neticesinde S-300 ve S-400niñ eki radarı yoq etildi, üçünci RLS içün neticeleri ögrenilir. Forbes qayd etti ki, "Belbek" uçaq limanı, Rusiye AAQniñ eñ yahşı ava mudafaası sistemaları içün bir qapqan ola. İşğalciler olarnı qoyar-qoymaz, Ukraina Mudafaa quvetleri yañı sistemalarğa ateş açalar. Bozarğan aynıñ 11. kününe qadar Oryx analitikacıları bildirdiler ki, Rusiyeniñ eki komandan noqtası, dört radarı ve 16 S-400 uçuruv cihazı endi yoq etildi.
"Salı kününden (bozarğan aynıñ 11. kününden soñ — muar.) soñ neticeleri daa şiddetli ola bilir. Umumen, ukrain raketa ücümleri neticesinde S-400niñ dört ya da beş batareyasınıñ qısımları yoq etildi. S-400, raketalarğa qarşı silâ olaraq meydanğa çıqarılğan, amma kerçekten de o semereli degil. Rusiyeniñ S-400 em eñ yaqın obyektlerini, em de özüni qorup olamaz", — maqalede añlatıldı.
Rusiyeniñ S-400niñ eñ az 50 batareyası bar, bunıñ içün olarnıñ yedegi bitmedi. Lâkin ücümlerden yaşamasalar, işğalli ordu içün semereli olmaz. Beklenilir ki, işğal etilgen topraqlarda qoyulacaq rus bütün S-400 cihazları yoq etilir.
Telegram ve Facebookta Suspilne Qırım haberlerine abune oluñız
