Bozarğan aynıñ 10. künü "Hizb ut-Tahir"niñ birinci Canköy gruppasınıñ davası çerçivesinde makeme oturışı keçti. Rus qabaatlayıcı tarafı, davanıñ iştirakçilerinden biri Seityağa Abbozovnıñ evini tintmesinde iştirak etken şaatnı taptı.
Advokat Emil Kurbedinov Suspilne Qırımğa bu aqqında haber berdi.
Onıñ sözlerine köre, şaat bildirdi ki, işğalli FSBniñ hadimleri gece maalinde onı tapıp, Seityağa Abbozovnıñ evini tintmesine davet ettiler. Anda RFda yasaq etilgen kitaplar tapıldı.
Advokat bildirdi ki, qabaatlanğan Abbozov er şeyni añlattı. Kitaplar kerçekten tapıldı, amma oña ait degil edi ve atıldı.
Bundan ğayrı, Emil Kurbedinov haber berdi ki, makeme oturışında imaye etici taraf, sözlerini şübelemegen başlağan şaatqa suallerni berdi.
Bundan soñ, makemeci bozarğan aynıñ 25. künü saat 10:00ğa qadar teneffüs bildirdi.
Belli oldı ki, işğalciler davanıñ başqa iştirakçileriniñ tintilgen evlerinde olğan şaatlarnı soramağa devam etecekler.
"Hizb ut-Tahir" davasınıñ birinci Canköy gruppası aqqında ne bilemiz
2022 senesi arman ayında Qırımnıñ Canköy rayonındaki evler kütleviy şekilde tintilgen soñ altı qırımtatar adamı tutuldı: Enver Kroş, Vilen Temeryanov, Rinat Aliev, Murat Mustafaev, Seityağa Abbozov ve Edem Bekirov.
Tutulğan adamlar makeme oturışlarına barğan, qırım siyasiy mabüsleriniñ ailelerine yardım etken faalciler ediler. Olarnı "Hizb ut-Tahir" davasına ait olmağa qabaatladılar.
Rostov-na-Donudaki Cenübiy bölge arbiy makemesi faalci Enver Kroş, içtimaiy jurnalist Vilen Temeryanov, Rinat Aliev ve Edem Bekirovnıñ tevqif müddetini bu sene arman ayınıñ 29. kününe uzattı, dep advokat Emil Kurbedinov haber berdi.
O qayd etti ki, Seityağa Abbozov ev tevqifi astında olmağa devam etecek ve qoştı ki, rusiye makemesi imayeci tarafnıñ delillerini körmemezlikke urdı ve teneffüs bildirdi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, "qanunlarğa qarşı faaliyet"te ve böyle degen "cian hilâfeti"ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram ve Facebookta Suspilne Qırım haberlerine abune oluñız
