Makemeciniñ añlatuvında hata sebebinden "Hizb ut-Tahrir davası"nıñ Qurman gruppasınıñ iştirakçisi Arsen Abhayirov, Krasnoyarskiy kraynıñ Yeniseysk şeerindeki 2. apishanede kerek olğanından 2,5 ayğa çoq vaqıt keçirdi.
Advokat Edem Semedlâev "Qırım birdemligi"ne bu aqqında haber berdi.
Uquq qorçlayıcılar hatırlattılar ki, RFnıñ Cenübiy bölge arbiy makemesi Arsen Abhayirovğa üküm çıqardı. Öz añlatuvında qayd etti ki, boş aynıñ 3. kününden degil, 30. kününden başlap adam apishanede bulunacaq. Bu sebepten apishane ve makeme arasında ayret peyda oldı.
Belli olğanı kibi, Arsenniñ yañlış müddeti aqqında arizası, tek bozarğan aynıñ 5. künü baqıldı. 2024 senesi qara qış ayında on Yeniseysk apishanesinden Burât Ulusındaki müstemlekege etap ettiler. 2023 senesi berim ayından başlap o, makemge apishane müddetinen bağlı hatanı añlatmağa ve tüzetmege hitap etti.
Bundan ğayrı, makeme red etti ve makemeciniñ añlatuvını Arsen degil, Artur Abhayirovğa yolladı. Uquq qorçalayıcılar qayd ettiler ki, bozarğan aynın 5. künü oturışta Cenübiy bölge arbiy makemesiniñ makemecisi Vâçeslav Korsakov, siyasiy mabüsniñ talabını qısmen qanaatlendirdi ve üküminde tarihnen bağlı hata tüzetti, amma Arsenniñ adınen bağlı hatasını tüzetmedi. Onıñ sözlerine köre, makemeci tek makeme vesiqalarında hatalarnı tüzete bile.
"Daa eki buçuq ay Arsen daa şiddetli şartlarda keçirdi, daa az şeyler alğan, aqrabalarınen daa az körüşken ve evge daa az telefon etken edi", — advokat Edem Semedlâev qayd etti.
O bildirdi ki, siyasiy mabüs memuriy davanı yollaycaq.
"Hizb ut-Tahrir davası"nıñ Qurman gruppası aqqında ne bilemiz
2019 senesi kiçik aynıñ 14-ünde Qurman rayonınıñ (Krasnogvardiysk rayonı) Büyük Onlar qasabasında bu gruppanıñ üç iştirakçisi tutuldı.
2020 senesi boş aynıñ 3-ünde Rostov-na-Donudaki Cenübiy bölge arbiy makemesi, davanıñ iştirakçilerini maküm etti. RF CQniñ 205.5. maddesiniñ 1. qımsına ("Terror teşkilâtınıñ faayiyeti") mücibi Rustem Emiruseinovnı 17 senege, RF CQniñ 205.5. maddesiniñ 2. qısmına ("Terror teşkilâtınıñ faaliyetinde iştirak etüv") mücibi Eskender Abdulganiyevni 12 senege ve Arsen Abhayirovnı 13 senege maküm etti.
Epilerini Rusiyede yasaqlanğan, amma Ukrainada ve dünyanıñ ülkeleriniñ çoqusında serbest şekilde faat etken siyasiy islâm fırqası Hizb ut-Tahrirge ait olmaqta qabaatladılar.
Telegram ve Facebookta Suspilne Qırım haberlerine abune oluñız
