Qırımnıñ işğal akimiyeti, Kefedeki XIX asırnıñ soñu - XX asırnıñ başında qurulğan ve bölgeniñ medeniy mirası olğan üç yaz evini arac-mezatta 108 mln rublege (47,4 mln grivna) ve Yaltanıñ merkezindeki “Villa Yelena” musafirhanesini deyerli 1 mldr rublege (tahminen 433,3 mln grivna) satacaqlar.
Mayıs ayınıñ 21. künü teşviqiy malümat agentligi RİA “Novosti Qrım” bu aqqında haber berdi.
Böylece, “Villa Yelena”nıñ başlanğıç fiyatı 919 mln rubledir (404 mln grivna). 2023 senesi mayıs ayında işğalciler, XX. asırnıñ başında qurulğan Yaltadaki beş qatlı musafirhane “milliyleştirdiler”. Budan evel, litvan iş adamı Kolas İhoris, onıñ saibi edi.
Bu 5 yıldızlı misafirhaneniñ mefruşat, turmuş aletleri ve tehnikanen 30 nomerası ve dairesi, parking yerleri ve havuzını satacaqlar. Mayıs ayınıñ 27. künü arac-mezat olacaq.
Bundan ğayrı, rus “Kommersant”nıñ yazğanı kibi, Qırımnıñ işğal idare müdirligi Ğrığoriy Papahristonıñ “Taşlıq”, Oleksandr Abramovnıñ “Flora” ve Mıkola Ratğauznıñ “Aida” yaz evlerini ayrı bir lot olaraq satacaq.
Episileri - Kefeniñ tarihiy rayonında Ayvazov caddesinde yerleşken bölgeniñ medeniy mirasınıñ obyektidir. Bozarğan aynıñ 5. kününe qadar arac-mezatta iştirak etmek içün qayd etmek mümkün, bozarğan aynıñ 7. künü arac-mezat olacaq.
Tehnikiy al aktlarına köre, qaza alındadır. 1926 senesi yaz evleri, Kefe kommunal kurort trestiniñ, birazdan Şeerniñ icra eyyetiniñ saipligine keçti. Binalarda Stalin demiryolunıñ raatlıq bala evleri, veremden evelki şifahaneler ve “Volna” şifahanesi yerleşe edi.
Ayvazov caddesi, 35 adresindeki umumen 1,4 mert kvardat meydanlıqlı “Taşlıq” yaz evi, 1912-1914 ss. qurulğan dört binadan ibarettir. Tavriya hazine palatasınıñ reberi Ğrığoriy Papahrıstonıñ aqrabası, onıñ saibi edi.
Ayvazov caddesi 37 adresindeki 4 biñ mert kvadrat meydanlıqlı 1912-14 ss. qurulğan eki qatlı "Flora" yaz eviniñ saibi, Stalinniñ mesleatçısı, ermen advokayı oleksanr Abramov edi. 1917 senesi onı milliyleştirdiler, Ekinci cian cenki devrinde ise yaz evi deyerli viran etildi. 1951 senesi bina tamamınen tamir etildi.
Ayvazov caddesi 39 adresindeki aşhane korpusı, ahır ve köşüknen eki qatlı "Aida" yaz evi ise, satılacaq üç yaz evinden eñ eskidir. Bankçı ve alman ihrac şirketiniñ saibi Mıkola Ratğauzerniñ siparişine baş korpusı 1894 senesi qurulğan. 1912 senesi yaz evini qurmağa bitirdiler. Altı sene soñ bolşevikler onı zapt ettiler. Ekinci cian cenkinden soñ 1953 senesi Yuriy Kolomiyçenko yaz evini tamir etti.
Telegram ve Facebookta Suspilne Qırım haberlerine abune oluñız
