Mayıs ayınıñ 8-17. künleri Sofiya şeerindeki "Missiya" galereyasında belli ukrain keramika ustası Rustem Skibinniñ "Qalqan" sergisi olacaq. Bu sergi, qırımtatar halqınıñ genotsidiniñ fedaları hatıra kününe bağışlanğan.
Facebookta Bulğaristandaki Ukraina Elçiligi bu aqqında haber berdi.
Sergide qırımtatar örneginen qalqan şeklinde keramik pannolarnı körmek mümkün. Sergide qırım tarihı ve medeniyetinen bağlı malümat posterleri de bar.
"Ensi 20 senedir bu artefaktlarnı qırıdmağa çalışqan Ressam Rustem Skibinni hayırlamağa isteyim. Bu tarihiy örnekler – uyanuv, adaletsizlikke muqavemet ve ayatnıñ saqlanması ve devamınıñ timsalidir", — dep Bulğaristan tiş işleri naziriniñ muavini Mariya Angeliyeca qayd etti.
Bulğaristan elçisi Olesâ İlaşçuk, serginiñ müimligini qayd etti ve bu serginiñ qırımtatar halqınıñ genotsidiniñ fedaları hatıra kününe bağışlanğanını bildirdi.
"80 sene evel mayıs ayınıñ 18. künü Stalinniñ emrine köre, bütün qırımtatarlar Qırımdan sürgün etildi. Yolda ve sürgünlikniñ ilk seneleri sürgün etilgenlerniñ yarısı elâk oldı. Qırımtatarlarnıñ sürgünligi, XX. asırnıñ eñ şiddetli cinayetlerinden biri oldı", — dep Ukraina elçisi qayd etti.
Facebookta usta Rustem Skibi, sergige nasıl azır olğanını kösterdi.
"Bugün küneşli Bulğaristan ilk kere qırımtatarlarnıñ medeniy mirasınen, şu cümleden askerlerimizniñ arbiy silâsınıñ örnekleriniñ zemaneviy şeklinde tanış olacaq, ilk kere «Qalqan« körecek ve kerçekten Qırımnıñ Ukraina olğanını añlamağa imkânı olacaq", — dep Skibin qayd etti.
Elçilikte haber berdiler ki, Sofiyada qırımtatar ve ukrain cemaatınıñ vekilleri, siyasiy, ihtisasiy, sanat ve diplomatik saalarınıñ faalcileri ve bulğar cemaatı sergini ziyaret ettiler.
Telegram ve Facebookta Suspilne Qırım haberlerine abune oluñız
