Ukrain programmacıları iOS ve Android içün qırımtatar tilinde bedava mobil oyunı Lağoda QTnı işlep çıqardılar. Bu, medialı aqıl oyunı. Er bir seviye — belli qırımtatar muelliflerinden biriniñ şiiridir. Anda hata tapmaq kerek.
Ukrain programmacısı, oyunnıñ çıqarıcısı Saşa Kozlov Suspilne Qırımğa bu aqqında haber berdi.
"Oyun devamında qırımtatar metinlerini oqumaq ve olarnıñ manasını añlamaq kerekligine köre til bilmeden bu oyunda ğalip olmaz. Faqat o, tek şairlernen tanış olmağa degil, til mükemmelleştirmege, söz luğatını kenişletmege yardım etecek", — dep añlattı.
Oyunnıñ esası, Kozlovnıñ işlep çıqarğanı ukrain tilinde "Lagoda" oyunı oldı. Onıñ dostu Andriy Lauş onıñ qırımtatar versiyasını da çıqarmağa pek istedi. Birazdan Mamure Çabanova ve Esmera Asanovanen tanış oldı. Olar şiirlerni saylap tercime ete ve oyunnı testleştire ediler.
"Esmera ve Mamure olmadan bu oyunnı yaratmaz edim", — dep programmacı añlattı.
Mayıs ayınıñ 7-sinde Facebook saifesinde yazğanı kibi Lağoda QT bedavadır. Anda reklama ve paralı abune, "donat" dögmesi de yoq. Oyun, eñ az 20 muellifniñ 150 eserinden ibarettir.
"Bu — hoş muzıkası ve asğaviy dizaynı vastasınen sizge raatlanmağa ve qırımtatar şiiriyetine dalmağa yardım etecek medialı bir oyundır", — dep Kozlov ayttı.
Telegram ve Facebookta Suspilne Qırım haberlerine abune oluñız
