İşğal etilgen Qırımda bu seneniñ soñuna qadar yerli "akimiyet" Qırımnıñ sakinlerinden temelden tamir içün tahminen 400 million rublelik borcunı mecburiy şekilde almağa istey.
"Qırım Cumhuriyetiniñ çoq daireli evlerniñ temelden tamiri bölge fondu"nıñ "baş müdiriniñ birinci muavini" Alamdar Amiraslanov teşviqat mediası RİA "Novosti Qrım"ğa bunı bildirdi.
"Umumen bu seneniñ soruna qadar temelden tamir içün tahminen 400 mln rublelik (166,6 men grn — muar.) borcunı almağa planlaştıramız", — dep bildirdi.
O qoştı ki, borclularnıñ adreslerine "18 biñ iddianame" endi yollandı. Onıñ sözlerine köre, bu paradan 75 men ruble (31,25 men grn) endi "ödendi", daa 13 men ruble (5,4 men grn) "istisal"dedir.
Keçenlerde "Fondanın plan-iqtisadiy idaresiniñ reberi" qayd etti ki, qırımda "çoq daireli evlerniñ saipleriniñ eñ az 80%-i muntazam şekilde ödeme yapa". Onıñ sözlerine köre, Yaltada eñ alçaq ödemeler seviyesi bar — tahminen 55%, Aqmescit şeerinde ise eñ az 80%dir.
Saq şeeriniñ sakini Suspilne Qırımda ealiniñ borcları aqqında haber berdi.
"Biz er ay temelden tamir içün ödemeler yapamız. Ödeme miqdarı kvadrat metr içün 8,5 rubledir (3,55 grn — muar.). Men er ay 298 ruble (124 grn — muar.) ödeyim. Şimdi menim borcum 3400 rubledir (1 416 grn — muar.), amma er ay men yavaş-yavaş onı ödeyim. Bu borcunı tamamınen ödemegen tanışlarım bar, belki olarnıñ borcusınıñ miqdarı endi onlarda biñ rubledir", — dep añlattı.
Faqat Saq şeriniñ sakini qoştı ki, şu temelden tamir nevbeti uzundır.
"Bizim evimiz 2032 senesi içün temelden tamir nevbetindedir. Men ayta bilem ki, 2023 senesi içün nevbetteki evler kereçekten temelden tamir etildi. Temel yañartıldı, kirişler ve balkonlar tamir etildi", — dep qayd etti.
Telegram, Viber ve Facebookta Suspilne Qırım haberlerine abune oluñız
