Kıyivniñ Podil rayon makemesi, Qırım işğal etilgen soñ Rusiyege hızmet etmege başlağan Qırım MCniñ İçki rayon makemesiniñ eski makemecisini devlet hainligiUkraina CQniñ 111. maddesiniñ 1. qısmı sebebinden ğıyabiy şekilde 13 senege maküm etti.
Çiçek ayınıñ 18-inde umumiy irişimi açılğan makemeniñ qararında böyle malümat qayd etildi.
Davanıñ bilgilerine köre, 2014 senesi saban-çiçek aylarında adam ant hainligini yaptı ve ukrain makemesiniñ temelinde qanunsız olaraq teşkil etilgen "Qırım Cumhuriyetiniñ İçki rayon makemesi"nde çalışmağa devam etti.
Jurnalist taqiqatı merkeziniñ bilgilerine köre, Kefe rayonınıñ Eseniki köy şurasını "ateşke bergeni" içün qırımtatar Aziz Fayzullaevni üç senege qanunsız olaraq maküm etken İhor Brajnik aqqında laf etemiz.
Bundan ğayrı, bu adam FSB işçileri tarafından öldürilgen Nabi (Ayüp) Rahimovnıñ apayı Sobiha Burhanovanı "Rusiyege kiriş/çıqış ya da toprağında bulunuv qaidelerini bozmaq"ta qabaatlı tanıdı ve yarımadadan Özbekistanğa sürgün etti. İşğalciler evini tintkende aqayını atıp öldürdiler. Olar bildirdiler ki, o "muqavemet kösterdi".
Qabaatlanğan adam olmadan ("ğıyabiy" üküm) mahsus makeme baquvınıñ neticelerine köre çıqarılğan üküm umumiy şekilde küçüni ala. Yani apellâtsiya şikâyetnamesini berüv müddeti (üküm çıqarılğan 30 kün soñ) bitecek soñ ve böyle şikâyetname yollanmasa, küçüni ala.
Apellâtsiya şikâyetnamesi yollansa ve o lâğu etilmese, apellâtsiya makemesi qarar alacaq soñ üküm küçüni alır. Aynı zamanda adam tutulğan vaqıttan berli ceza müddeti başlap sayıla, dep Qırım MC ve Aqyar şeeriniñ prokurorlığı añlattı.
Telegram ve Facebookta Suspilne Qırım haberlerine abune oluñız
