Çiçek ayınıñ 17-sinde rus apishanesinden azat etilgen Yaltalı siyasiy mabüs Refat Alimov Qırımğa evge keldi. Yaqınları, vatandaşlar ve advokat Edem Semedlâev onı qarşıladılar. Qızıltaş köyüniñ sakinleri ve faalciler körüşüvni teşkil ettiler.
Qırım birdemligi bu aqqında haber berdi.
"Men bunı 8 sene bekley edim ve endi müdetim soñuna yetti. Men evimge keldim. Çoq duyğum bar, olarnı sözlerge çeviremem. Men çıqqan ve meni qarşılağan andan, mına ketkende duyğularnen tolum. Er vaqıt çoq duyğum bar, endi birazdan evde olacağımnı añlayaraq çeşitli duyğu duyam", — dep Alimov añlattı.
Onı ve başqa siyasiy mabüslerni destek etkenlerge, advokatlar ve faalcilerge teşekkür bildirdi.
"Bu, tek menden, anda apishanede qalğan ve menim vedalaşqanım qardaşlarımdan teşekkür sözleridir. Bu destek, er vaqıt alğanları mektüpler içün vastasız teşekkür bildirmege rica ettiler. Olar bizge tez ğalebege ışıq, ümüt bereler. Bu desteknen biz añlaymız ki, adalet bizim tarafımızdadır", — dep eski siyasiy mabüs qayd etti.
Alimovnıñ anası Emine Lümanova da destek içün teşekkür bildirdi.
"Bugün menim içün pek yahşı bir kün. Tünevin oğlum azat etildi, bugün ise advokatları onı sağ-sağlam alıp ketirdiler. Bütün 8 sene boyunca alğanımız destek içün cemaatqa büyük teşekkür bildirmege isteyim. Bizge ellerinden kelgenince yardımcı oldılar. Elbette, 8 sene ana olaraq menim içün pek zor", — dep ayttı.
Qadın qayd etti ki, o endi qorqmay ve oğlu yanında olacaq.
Alimov haber berdi ki, onı qarşılaycaq ve hayıraycaq o qadar çoq insannı körmege beklemey edi.
"Maña çoq yahşı söz ayttılar, amma men tüşünem ki, olarnı maña degil, sizge aytmaq kerek. Çünki tamam siziñ yardımıñıznen, bizim halqımıznıñ ve bizni destek etken er kesniñ yardımınen biz bu sınavdan itibarnen keçtik", — dep Alimov qoştı.
BBundan ğayrı, destegi içün siyasiy mabüslerniñ aqrabalarına teşekkür bildirdi ve qanunsız olaraq apis etilgenlerni destek etmege devam etken insanlarnı qaramanlar adlandırdı.
Refat Alimov aqqında ne bilemiz
Refat Alimov — 28 yaşındaki qırımtatar, "Hizb ut-Tahrir"niñ Yalta gruppasınıñ iştirakçisi olğan İnver Bekirovnıñ qardaşınıñ oğludır. 2016 senesi çiçek ayınıñ 18-inde onıñ evi tintilgen soñ Refat "terror faaliyetinde iştirak etmege" qabaatlanıp tutuldı.
2019 senesi boş aynıñ 12-sinde Rostov-na-Donuda "Hizb ut-Tahrir"niñ davasınıñ iştirakçilerinen soñ makeme oturışı oldı. Anda üküm çıqarıldı. Makeme oturışı 14 daqqa devam etti.
Makemeciniñ qararına binaen, qabaatlanğan adamlar qabaatlı tanındı: Refat Alimov 1 senege serbestlik sıñırlanmasınen 8 senege, Muslim Aliev 1 senege serbestlik sıñırlanmasınen 19 senege, İnver Bekirov 1 senege serbestlik sıñırlanmasınen 18 senege, Vadım Siruk 1 senege serbestlik sıñırlanmasınen 12 senege, Arsen Cepparov 1 senege serbestlik sıñırlanmasınen 7 senege, Emir-Usein Kuku 1 senege serbestlik sıñırlanmasınen 12 senege maküm etildi.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
Telegram, Viber ve Facebookta Suspilne Qırım haberlerine abune oluñız
