Cumaaqşamı künü kiçik aynıñ 29-ında işğal etilgen Qırımnıñ Kefe rayonınıñ Seyit Eli köyünde ve Eski Qırım şeerinde rus quvetçileri, dört qırımtatarnıñ evini tinttiler. Bundan ğayrı, işğalciler Eski Qırım camisini tinttiler.
Facebookta "Qırım birdemligi" bu aqqında haber berdi.
UPD: Lenur Yakubovnıñ memuriy davasınıñ bilgilerini işğal etilgen İslâm Terek rayonınıñ makemesine yollandı. "Aşırıcılıqqa qarşılıq merkezi"niñ işçileri, RF MBQniñ 20.3. maddesine ("Natsizm işaretleri ya da timsalleriniñ, ya da aşırıcılıq tekilâtınıñ işaretleri ya da timsalleriniñ, ya da federal qanunlarda yasaqlanğan nasıldır başqa işaretler, timsallerniñ propagandası ya da halq ögünde kösterilüvi") mücibi oña qarşı memuriy ptotokol tizdiler.
İslâm Terek qasabasındaki "polis" bölüginden "Eski Qırım" meustaqil musulman cemaatınıñ imamı İzet Sayfullin çıqtı. RF MBQniñ 5.26. maddesine ("Missioner faaliyet çerçivesinde diniy teşkilât tarafından tolu resmiy adı, ya tolu olmağan, ya da yañlış adınen edebiyat, kitaplar, ses ve video malümatınıñ çıqarıluvı ya da tarqatıluvı") mücibi oña qarşı memuriy ptotokol tizildi.
"Vesiqalarda qayd etildi ki, qara qış ayınıñ 19-ında bir adam camide olğan, aramızda turan adam yazıp qoydı ki, Cuma namazını qıldım ve böylece olarnıñ versiyasına köre qanunsız missioner faaliyetini yaptım", — dep Sayfullin qayd etti.
İslâm Terek qasabasındaki "polis" bölüginden "Eski Qırım" meustaqil musulman cemaatınıñ başı İdris Yurdamovnıñ evi tintilgen soñ añlattı ki, işğalcilerniñ bildirgenleri qabaat, böyle degen missioner faaliyetidir. O, quvetçilernen razı degil.
"Halq tarafından saylanğan imamımız İzet Sayfullindir. İnsanlar ondan tamamınen memnünler. O, İslamnıñ bütün talaplarına uygundır ve Cuma namazını qılmaqnen bağlı meseleleri yoq. Şimdi ise organlarnıñ hadimleri tüşündiler ki, olarnıñ qarışmaq aqqı bar. Bizge haber berdiler ki, bizden ruhsat almadan, endi eki aftadır cami Qırım Musulmanları Diniy İdaresiniñ kontrolı astındadır. Kimse bilmey edi. Ne cemaat, ne mında yaşağan köyniñ sakinleri bunı bile ediler. Ve şimdi aytalar ki, himaye etilgen imamdan başqa kimse namaz qılmaz. Ayttılar ki, yarın polislernen beraber Cuma namazına kelecek. Yañı imamı qorçalaycaqlar", — dep qayd etti o.
Yurdamov qoştı ki, yerli sakinlerden ruhset almadan, kimseniñ mecbur etmek aqqı yoq. Bundan ğayrı, bundan evel cemaatnıñ müftiyattan yedi sene devamında namaz qılğan imamı bar edi, amma ğayıp oldı ve onıñ bulunğan yerini alâ daa kimse bilmey.
"Halq, imam olmadan namaz nasıl qılacağımıznen meraqlanmağa başladı. Neticesinde toplaşıp, onı (İzet Sayfullini - muar.) sayladıq. O, Qurannı pek yahşı, arap tilini bilgen bir adamdır. Er kes onı sayladı ve o zamandan berli o namaz qıla", — qayd etti o.
Aynı zamanda Lenur Yakubovğa bildirgen qabaatnen bağlı bilgiler yoq. O, bu mustaqil cemaatnıñ azası olmay.
Advokat Emil Kurbedinovnı "polis" bölügine yibermeyler.
İslâm Terekteki polis binasınıñ kirişi yanından turam. Qaravul telefon ete — telefon açmaylar. Olarnıñ mında olıp-olmağanlarını aytmay", — dep qayd etti o.
Evlerini tintken soñ işğalcilerniñ tutqanları "Eski Qırım" meustaqil musulman cemaatınıñ imamı İzet Sayfullin ve faalci, iş adamı Abdulla (Lenur) Yakubovnı bekleyerek, qırımtatarlar İslâm Terek qasabasındaki işğal etilgen İİNniñ bölügi yanında toplaşalar.
Qırımtatar Şevken Kiyamov ve İdris Yurdamovnıñ evlerini tintken soñ evde qaldılar.
"Bugün saba namazı qılınğan soñ dua etip orta edim. Baqsam, kapı pek qaqıldadı. Men dedim, kimler?, dep azbara çıqtım. Baqsam, tüfeklerinen on deneye yaqın ükümet hadimleri edi. Soñ aman adresniñ doğru olıp-olmağanını dediler. Men olarğa menim böyle adresimniñ olğanını dedim. Bundan soñ bizim postamovleniye (titüv qararımız - terciman) var, dedi. Biz qıdırıp geldik, narkotik, orujiye (silâ - terciman)... Oborot olmayan (qanunsız - terciman) bir şey varmı, saqlaysıñızmı, dedi. Dedim, öyle şeyler yoq. Özlerine bara bar, ponitolar (şaatlar) deyen adamlarnı ketirgenler eken. Eviñizni baqıp teşkereyiq, dedi. Men ise giriñiz, baqıñız, dedim. Girdiler, er şey teşkerdiler, menim kitaplarım, Quranlarım vardı. Episini açıp baqıp, qırdılar. Bir şey tapmadıq, dediler, sizde bir şey yoq", — dep Kiyamov añlattı.
"Bu pek büyük ğadap duydura. Halq arasındaki bu telâşlı vaziyet sakinleşmeyip, halq pek raatsızlana. Büyük bayram, Ramadan bayramından evel halqnı sebepsiz raatsız etken nasıldır organlarnıñ şu areketlerinden halqımız memnün degil. Öz memnüniyetsizligim, ğadabımnı bildirmege isteyim", — dep tutulğan Yakubovnıñ qardaşı Nuri qayd etti.
O qoştı ki, qırımtatarlar Qırımda, öz vatanında sakince ve barışıq içinde yaşamağa ve yarımadanı inkişaf ettirmege isteyler.
"Halqımız pek çalışqır ve onı edepten tış şeylerde qabaatlamaq, bizim halqımızğa uyğun bir şey degil", — dep Muri qoştı.
"Aşırıcılıqqa qarşılıq merkezi"niñ işçileri, faalci Abdulla (Lenur) Yakubovnıñ evini tintken soñ onı alıp, belli olmağan bir yerge kettiler.
"Eski Qırım" meustaqil musulman cemaatınıñ imamınıñ evi tintilge soñ imam İzet Sayfullinniñ apayı Riyane Eyüpova añlattı ki, bu tedbir vaqtında işğalciler bir qaç kitap alıp çıqardılar. Aynı zamanda adamnıñ "polis" bölükleriniñ qaysı birine ketirilgenini bildirmediler.
İşğalciler İdris Yurdamovnı yiberdiler. Onıñ apayı Lili qayd etti ki, evini tintmek içün quvetçiler, ev qorasından atladılar, çünki anda kod kiliti bar, bundan soñ açıq aşhaneden evge izin almadan kirdiler. Çoq şey teşkermediler, üzerindeki şeylerni baqtılar, vesiqalarını baqtılar.
"Eski Qırım" meustaqil musulman cemaatınıñ imamınıñ evi tintilge soñ imam İzet Sayfullin ve Lenur Yakubov, faalci Şevket Kiyamov ve "Eski Qırım"nıñ başı İdris Yurdamovnıñ evlerini de tinttiler.
Kıyiv vaqtına köre saba saat 06:40ta Yurdamovnıñ evini tintmege bitirdiler. Bundna soñ "Aşırıcılıqqa qarşılıq merkezi"niñ hadimleri onı alıp, Eski Qırım camisine kettiler. Ve camini tinttiler.
Saba saat 07:05te Sayfullinniñ evini tintken soñ onı alıp kettiler.
Saba saat 07:30ta Kiyamovnıñ evini tintmege bitirdiler. Onı tutmadılar.
Yakubovnıñ aoayı Sevilâ Kantuğanska añlattı ki, tintüvler neticesinde saba saat 05:30 - 06:55 arasında işğalciler eki laptopnı, üç cep telefonını, onıñ pasportı ve kitapnı alıp çıqardılar.
Malümat yañartıla...
Telegram ve Facebookta Suspilne Qırım haberlerine abune oluñız
