İşğal etilgen İslâm Terek rayonı makemesi, memuriy uquq bozmağan imam İsmail Yurdamovnıñ qabaatını tanımayıp yiberdi.
Advokatı Rustem Kâmilev bunı añlattı, dep "Qırım birdemligi" haber berdi.
Bildirildi ki, işğal makmesi şikâyetname alıp onı qanaatlendirdi. Yurdamovnıñ davasını qapattı, çünki memuriy qanunlar bozulmadı.
"Yurdamov, meseleniñ ne olğanını tafsilâtlıca añlattı. Ve eñ esası, camide dua oqumaq ve namaz qılmaq içün insanlar özlerinden birini saylaya bileler", — dep uquq qorçalayıcı qayd etti.
İmam İsmail Yurdamov aqqında ne bilemiz
İlk qış ayınıñ 13-ünde saba maalinde rus quvetçileri, Qırımnıñ İslâm Terek rayonındaki Cuma Eli köyünde imam İsmail Yurdamovnıñ evini tinttiler. Bundan soñ onı tuttılar ve "politsiya bölügi"ne ketirdiler. İmamnıñ qızı Gülsüm Yurdamovanıñ sözlerine köre, quvetçiler tintüv sebebi, babasınıñ qırım siyasiy mabüslerini faalca destek etmesidir.
Birazdan imam İsmail Yurdamovnı "vicdan azatlığı, din azatlığı ve din birleşmeleri aqqında qanunlarnı bozaraq qanunsız missioner faaliyeti"nde qabaatladılar. Bundan ğayrı, işğalciler oña 8 biñ rublelik (3,3 biñ grivna) para cezasını berdiler.
Telegram ve Facebookta Suspilne Qırım haberlerine abune oluñız
