Qırımnıñ İslâm Terek rayonındaki Cuma Eli köyünde imam İsmail Yurdamovnı "vicdan azatlığı, din azatlığı ve din birleşmeleri aqqındaRF MBQniñ 5.25. maddesiniñ dörtünci qısmı qanunlarnı bozaraq qanunsız missioner faaliyeti"nde qabaatladılar.
"Qırım birdemligi" bu aqqında haber berdi.
İlq qış ayınıñ 13-ünde saba maalinde Yurdamovnıñ evini tinttiler, politsiya bölügine ketirdiler, amma birazdan yiberdiler.
Saba saat altıda imam saba namazını qılmağa başlağan soñ qapısı yanında bir maşna toqtadı. Onıñ sözlerine köre, insanlarnıñ azbarğa kirmege başlağanlarını kördi.
"O zaman ne olğanını añladım. Tezce apayımnı uyandırdım", — dep İsmail Yurdamov ayttı.
O zaman rus quvetçileri, tintüv kararını oqudılar. Anda bildirildi ki, İsmail Yurdamov Rusiyede yasaqlanğan Hizb ut-Tahrir teşkilâtında iştirak etse, onıñ oturışlarını teşkil etmese kerek. Yurdamov vesiqalarnı imzalamağa red etti.
Tintüvler vaqtında imamnıñ 11 yaşındaki qızı Hatice eki kere bayıldı. Operativciler bütün kitaplar, malümat kâğıtçıqlarına baqtılar. Şübeli körüngen olardan bazılarını bazada teşkerdiler ve "er şey yahşı" dep bildirdiler.
Tintüv vaqtında politsiyacılar, azbardaki ekinci evge de kirdiler. Anda imamnıñ qızı Gülsüm Yurdamıva balalarınen yaşay. İmam, olarnıñ o evge kirmemelerini talap etti. Faqat quvetçiler imamnıñ qızınıñ evini, azbardaki bütün hocalıq bünyelerini de tinttiler. Tuvuqlıqqa baqtılar. Tintkenleri camige de kettiler.
Bundan soñ Yurdamovnı işğal politsiyası bölügine ketirdiler, anda oña qarşı memuriy protokol tizdiler. Böyle degen Aşırıcılıqqa qarşılıq merkeziniñ operativcileri onı tenbiyelediler ki, kelecekte onı makemege çağıracaqlar. İmam qabaatınen razı olmadı.
Endi İslâm Terek rayonındaki politsiya bölüginde belli oldı ki, "E" Merkeziniñ işçileri, şu cümleden politsiyanıñ üyken zambiti Roman Filatov, evini tinttiler. Filatov, qırımtatarlarnı taqip etüv ceryanında iştirak ete, internette yayınlanğan postlar sebebinden insanlarğa qarşo protokollarnı tizdi, qırımtatar advokatlarını tuttı.
İmamnıñ qızı Gülsüm qayd etti ki, onıñ eviniñ tintilmesi, babasınıñ qırımtatar siyasiy mabüslerini faalca destek etmesinen bağlıdır.
"Qırımda ve Rostovda er vaqıt makeme oturışlarını ziyaret ete edi. Qanunsız olaraq tevqif etilgen qırımtatarlarnı qorçalamaq içün bizim köyümizniñ çavuşları adından söz ayta edi. Bundan ğayrı, endi 20 senedir imam olıp çalışa. Dua qıla, nikâh merasimlerini keçire edi. İnsanlar oña suallernen muracaat ete ediler", — dep Gülsüm haber berdi.
Telegram, Viber ve Facebookta Suspilne Qırım haberlerine abune oluñız
