Advokat Edem Semedlayevniñ hitabına Aqyardaki Rusiye İİNniñ işğal taqşqat idaresi cevap berdi ki, bir ay evel FSB işçileri tarafından tutulğan Farhad Soliyevniñ bulunğan yerini bilmey.
"Qırım birdemligi" bu aqqında haber berdi.
İşğal idaresiniñ reberiniñ muavini vazifesini vaqtınca yapqan R. Degtârövnıñ bilgilerine köre, Aqyardaki qısımda Soliyev tutulmadı, oña qarşı cinaiy dava açılmadı, taqiqat areketleri yapılmadı. Şeerdeki makemede qorçalayıcı tedbir oña da saylanmadı.
Uquqçı Lilâ Gemeciniñ sözlerine köre, bir ay evel Qırım sakini tutulğan soñ belli olğan tek budır. Uquq qorçalayıcılar FSVP, arbiy-taqiqat bölügi, RF arbiy prokurorlığı, "garnizon ve Qırım Cumhuriyeti prokurorlığı", "Gagarin rayonı OVS" ve "Aqmescit OVS", Rusiye İİN ve FSBe hitap yolladılar.
"Kimse cevap bermedi. Tek bir kere (Farhad Soliyevniñ anasına - müar.) telefon etip, qaysı bilgilernen (ğayıp olğan oğlu aqqında taqiqat - müar.) tanış olmağa istegenini soradılar", - dep Lilâ Gemeci qayd etti.
Uquq qorçalayıcı qoştı ki, bu afta ilk qış ayınıñ 11-inden başlap uquq qorçalayıcı organlarnıñ işsizligine qarşı makemege dava açıp yollamağa planlaştıra.
Farhad Soliyev ve Server Aliyevni tutulması aqqında ne bilemiz
Boş aynıñ 3-ünde FSB hızmet maşnasınen Soliyev ve onıñ işdeşi Aliyevni belli olmağan yerge alıp kettiler. İşğal İİNniñ işçileri, tutuv aqqında cinay dava açmağa ve aqrabalarına taqiqat ceryanı aqqında haber bermege red ettiler, çünki FSBnin "olarnı 15 kün devamında tutmaq aqqı" bar.
"LizaAlert" qırım qıdıruv hızmetiniñ göñüllileri, "FSB işçileri" eki tutulğan qırımtatarnıñ bulunğanları yerni bileler, dep Farhad Soliyevni qıdırmağa toqtadılar.
Aynı zamanda işğal makemeleriniñ saytında tutulğan qırımtatarlarnıñ davalarınıñ olarğa yollanğanı aqqında iç bir malümat yoq. Advokatlar da ITT ve mahsus müstemlekelerde adamlarnı tapamadılar. Öz menfaatını qorçalamaq içün FSB de tayin etilgen advokatlarnı soramadılar.
Telegram, Viber ve Facebookta Suspilne Qırım haberlerine abune oluñız
