Lağabı "13" olğan Ukraina arbiy istihbaratınıñ deñiz uçucısız aletleri flotunıñ komandanı, RF Qaradeñiz flotuna deñiz dronlarınen ücümlerniñ tafsilâtlarını añlattı. Bu, Qara deñizde gemilerge azatlıq taminatı ve ukrain limanlarına ecnebiy ticaret gemileri içün koridornıñ açılışnıñ sebebi oldı.
The Times britaniya neşirine bu aqqında haber berdi.
Asker, rus gemilerine bir qaç muvafaqiyetli ücümlerde, şu cümleden 2023 senesi boş aynıñ 10-unda işğal etilgen Qırımdaki Aqmeçit qasabası yanındaki mahsus operatsiyada iştirak etti.
O añlattı ki, o kün saba maalinde ukrain deñiz uçucısız aletleri, gemilerge qarşı ağlarnı aşıp, limanğa kirdiler. İşğalciler olarnı körip, ateş açtılar, faqat dronlarğa mania olamadılar.
Bu ücüm neticesinde deñiz uçucısız aletleri, işğalcilerniñ zırhlı maşnanen "Akula" ve "Serna" sınıflı eki dessant gemisini mahv ettiler. Daa bir dron, tamir bölüginde patladı.
"Olar, keleceklerimizni bile ediler, amma iç bir şey yapamadılar. Pek quvana edik. Ayatımnıñ maqsadı, rus gemisini yoq etmek edi ve biz eki gemisini yoq ettik... Şimdi yañı maqsadımız bar — daa çoq gemisini mahv etmek", — dep Ukraina MNniñ İstihbarat baş idaresiniñ askeri qayd etti.
Bundan ğayrı, 2023 senesi mayıs ayınıñ 25-inde ve berim ayınıñ 14-ünde deñiz donları vastasınen "İvan Hurs" rus istihbarat gemisi ve "Sergey Kotov" yañı patrul gemisi mahv etildi.
İstihbaratçılar, bu uçucısız aletlerni "pek semereli silâ" tanıdılar. Olarnıñ fıyatı, meselâ "Sergey Kotov" gemisiniñ inşaasından ve taqımnıñ azırlamasından biñlerce qat küçüktir.
Başqa USQ bölükleri, UTH de özüni öldürici deñiz dronlarını qullanalar. Misal olaraq, Sea Baby Qırım köprü, "Admiral Makarov" rus fregatı, yañı yermay tankeri Sig ve "Olenegorskiy gornâk" dessant gemisini ücüm etti.
Ukrain deñiz dronlarınıñ operatorları, suvdaki cenk usullarını deñiştireler, çünki ucuz ve tezce yapılğan dronlar ögünde duşmannıñ büyük gemileriniñ zayıflığını ögreneler.
Büyük Britaniya, AQŞ ve Ukrainanıñ işdeşligi neticesinde ukrain ücüm deñiz dronları yapıldı ve rus flotı çoq zarar körip, Qara deñizniñ ğarbiy qısmından çıqarıldı.
"Men daa çoq rus gemisini mahv etmege arzu etem, mümkün olğance çoq, olarnıñ yaldamamaları içün. Bütün RF Qaradeñiz flotunı yoq ete bilirmizmi? Ebet. Ve bunı yapmağa çalışamız", ― dep "13" bildirdi.
The Times yazdı ki, bu silânen muvafaqiyetli ücümler, Qara deñizde gemilerniñ azatlıq teminatınıñ sebbei oldı. Olar vastasınen ecnebiy ticaret gemileriniñ ukrain limanlarına areketi içün koridor yaratıldı.
"Biz tarih yazamız ve bizim ğarp ortaqlarımız, bu aletlernen pek meraqlanalar", ― dep MNniñ İBİniñ uçucısız aletler flotunıñ komandanı qayd etti.
Şu cümleden, Magura V5 uçucısız aletinen meraqlanalar. Onıñ yañılığı, duşmannıñ gemileriniñ yolunda minalarnı qoymağa ve bazasına qaytmağa imkân bere. Onıñ eki kamerası, infroqırmızı optikası, idare noqtasına kamera siganı keçken yoldaş modulı bar.
300 at küçündeki köçüricisi vastasınen Magura V5, saatte 45 deñiz mili tezliginde uça bilir. Saatte 25 mil olğan kreyser tezligi, 250 millik yol temin ete. 250 kg silâ, dronnıñ burun qısmında yerleşe, onıñ arbiy qısmı daa ağır.
Telegram, Viber ve Facebookta Suspilne Qırım haberlerine abune oluñız
