11 senege maküm etilgen Vadım Bektemirovnı Lıpetsk vilâyetindeki Yelts şeeeriniñ apishanesinden başqa müstemlekege etap ettiler. Bir aydır ailesi onı tapamay ve ondan haberlerni almay.
Lemana Bektemirova "Qırım birdemligi"ne bu aqqında haber berdi.
Bildirildi ki, berim ayınıñ 21-inde onıñ kameradaşı Vladlen Abdulkadırov "Zonatelekom" apishane bağı vastasınen Vadım Bektemirovnı başqa müstemlekege etap etkenlerini haber berdi. Ailesine resmen iç bir şey aqqında haber bermediler. Lemana Bektemirova aqayınıñ apshanedeki yañı adresini ögrenmek içün Rusiye FCVPge mektüp yolladı.
RF Federal ceza hızmeti aqrabalarına haber berdi ki, "apishanede ve taqiqat izolâtorlarında bulunğan ve ceza alğan insanlarnıñ şahsiy bilgileriniñ merkezleştirilgen sicili yoq".
"Onıñ aqqında iç bir şey bilmeyim. Özüm nasıldır onı tapmağa ümüt eterek, Rusiyedeki çoq müstemlekege bir qaç elektron mektüp yolladım. Amma bazı müstemlekeler cevap bermeyler, bazı yerlerge elektron mektüpler yollamaq mümkün degil, başqaları ise yazalar ki, o yerde böyle insan yoq", — dep Bektemirovnıñ apayı añlattı.
Vadım Bektemirov aqqında ne bilemiz
Vadım Bektemirov, arap edebiyatı ve gumanitar ilimler bölüginiñ "İslâm oquvları" ihtisasında magistrdir. Tevqif olunmadan evel siyasiy mabüslerniñ ailelerini destek etmek içün dua ete , epis etilgen qırımtatar musulmanlarına posılkalarnı yollamağa yardım ete, siyasiy sebepli davalarnıñ oturışlarına bara edi. 2020 senesi oraq ayınıñ 7-sinde Qırımdaki kütleviy tintüvlerden soñ Bektemirov tutuldı. O, 2003 senesinden başlap Rusiyede yasaqlanğan "Hizb ut-Tahrir"niñ faaliyetinde qabaalandı.
2022 senesi kiçik aynıñ 11-inde Rusiyedeki Cenübiy bölge arbiy makemesi Vadım Bektemirovnı 11 senege maküm etti. Ceza müddetiniñ birinci üç senesini apishanede keçirecek edi. 2023 senesi çiçek ayınıñ 3-ğnde Vlasıstaki Apellâtsiya arbiy makemesi ükümini deñiştirmedi.
Hizb ut-Tahrir islâm fırqası sadece Rusiyede terrorcı bir teşkilât olaraq tanındı, çünki bu teşkilâtnıñ azaları, musulmanlarğa repressiyalar sebebinden muntazam tarzda işğal akimiyetini tenqit ete ediler. Aynı zamanda Hiz ut-Tahrir dünyanıñ ülkeleriniñ çoqusında ve Ukrainada serbest şekilde faal ete.
