Ekim ayınıñ 12-sinde Cumaaqşamı künü işğal etilgen Qırımdaki Aqmescit rayonınıñ Tröhprudne köyünde FSB işçileri, 21 yaşındaki qırımtatar Lütfiye Veliyevanı tuttılar ve soratuvğa ketirdiler. Bu, soñ üç kün devamında onıñ ana-babasınıñ evindeki ekinci tintüvdir.
Veliyevanıñ aqrabalarına atıf eterek, "Qırım birdemligi"ne tefsir etkende advokat Edem Semedlâyev bunı añlattı.
Böylece, ekim ayınıñ 12-sinde saba maalinde üç "bus"tan engen silânen OMON işçileri, onıñ ailesini uyattılar. Veliyevanıñ iç bir şeyi alıp çıqarmadılar, faqat tintüvler vaqtında tapmağanları cep telefonını qıdıra ediler.
"Men FSB binasına ketkende olar endi anda ediler. Men, onen ve babasınen laf ete bildim, amma deyerli on saniye. FSB operativ işçisi binağa meni yibermedi, ayttı ki, advokatqa alâ daa ihtiyacı yoq. Men ise itiraz bildirdim — maña işanğan insanlar tüşüneler ki, olarğa uquqiy yardım kerek. O ise bunı ayttı: "Yuqarı organlara hitap etiñiz, şikâyet etiñiz. Ne yapmağa istegeniñizni yapıñız, amma men sizin yibermeycegim", — dep advokat qayd etti.
Bundna evel ekim ayınıñ 10-unda Aşırıcılıqqa qarşılıq merkezi"nden "politsiya" işçileri, bu evni endi tinttiler. Birazdan qırımtatar qızınıñ añlatuv malümatnamesini alıp çıqardılar.
"Teşkerüv çerçivesinde tintüv keçirdiler — sanki "VKontakte" içtimaiy ağında (Ukrainada yasaq etildi — müar.) Veliyeva, RF Silâlı quvetlerini itibardan tüşüre edi. Mende memuriy ya da cinaiy dava açmasının bağlı malümat yoq, amma Qırımda qadınlarnıñ taqipleriniñ artqan sayısınen bağlı vaizyet, meni pek raatsız ete", — dep Semedlâyev qayd etti.
UPD: Lütfiye Veliyeva azat etildi. FSB binasından babasının beraber çıqtı, dep "Qırım birdemligi" haber berdi.
Qırımda qırımtatar qadınlarınıñ taqipleri aqqında ne bilemiz
- 2023 senesi arman ayınıñ 7-sinde FSB, Eski Qırımlı 25 yaşındaki qırımtatar Emine Zekeryayevanıñ evini tinttiler ve onı tuttılar. Onı soratmaq içün Aqmescitke ketirdiler ve onıñ cep telefonına irişim almağa tıraşa ediler. Aqşam maalinde onı azat ettiler.
- Rusiye tarafından "casuslıq"ta qabaatlanğan qırımtatar Leniye Umerovanı
- Lefortovskıy makemesi, Rusiye tarafından "casuslıq"ta qabaatlanğan qırımtatar Leniye Umerovanıñ tevqif müddetini daa üç ayğa – 2024 senesi qara qış ayınıñ 4-üne qadar uzattı. Bu, onıñ içün qorçalayıcı tedbiriniñ müddetiniñ üçünci uzatılmasıdır. Umerova, deñiştirilecegine ümüt ete.
Telegram, Viber ve Facebookta Suspilne Qırım haberlerine abune oluñız
