İşğal vaqtında Hersonda ruslar tarafından tutulğan ve Aqmescitteki 1. SİZOda tevqif etilgen ispan göñüllisi Mariano Garsia Kalatayuda, belli olmağan bir yerge ketirildi.
Esirniñ apayı Tetânağa atıf eterek öz Telegram kanalında Ukraina Yuqarı Şurasınıñ insan aqları vekili Dmıtro Lubinets, bu aqqında haber berdi.
"Onıñ sözlerine köre, bu sene berim ayınıñ soñunda onıñ aqayını Aqmescitteki SİZOdan alıp çıqardılar. Bir buçuq sene devamında anda onı qanunsız olaraq, qabaatlama bermeden, birazdan böyle degen "RF telükesizligine zarar getirici areketlerge ait oluv" içün tuta ediler", — yazdı o.
Ombudsmannıñ sözlerine köre, izolâtorda 75 yaşındaki ispan adamınıñ yaşı ve vatandaşlığına baqmadan onı çoq azapladılar.
Lubinets tüşüne ki, Kalatayudanı Herson vilâyetiniñ işğal etilgen topraqlarındaki Çonğar köyüne ketirgenler. Keçenlerde anda ruslar, resmiy olmağan SİZO açtılar.
Mariano Garsia Kalatayuda aqqında ne bilemiz
- Tutulmadan evel sekiz sene devamında Ukrainada yaşağan ve göñülli faaliyet yapqan İspaniya vatandaşıdır.
- 2022 senesi saban ayınıñ 19-ında o zaman işğal etilgen Hersonda Kalatayuda, Ukrainanıñ Birligi numayışına ketti. Anda balaklavanen tanışmağan adamlar onı tuttılar. Olar onı urdılar, ellerini bağlap, buğavlarnı taqtılar ve mavı maşnağa mindirdiler.
- Birazdan belli oldı ki, Marianonı Hersonda tutalar, bundan soñ azap ettiler, amma göñüllinen bağlanamaz mümkün olmadı.
- Birazdan QırımSOS uquq qorçalayıcı teşiklâtı haber berdi ki, onı Aqmescitteki 1. SİZOğa ketirdiler, anda bir buçuq sene devamında qanunsız olaraq apishanede qabaatlama beermeden, onı tuta ediler. Birazdan böyle degen "RF telükesizligine zarar getirici areketlerge ait olmaq"ta qabaatlandı.
- Bir kamerada ispan göñüllisinen beraber oturtılğan vatandaş reinesi Yevheniy Yamkovıy 2023 senesi azat etilgen soñ añlattı ki, yoqlav vaqtında hızmet köpegi Kalatayudanıñ tizini tişledi, neticesinde ayağında büyük bir yara izi qaldı. Bundan ğayrı, ruslar Marianonıñ bank kartınıñ pin-kodunı ögrenmek içün ispan adamını elektriknen azaplay ve ura ediler.
Telegram, Viber ve Facebookta Suspilne qırım haberlerine abune oluñız
