Qırımda işğalciler, mezun sınıfları ocaları içün usul kitabını azırladılar. Sınıftan tış derslerinde ukrain yarımadasınıñ sanki "göñülli" işğali añlatılır.
Milliy qarşılıq merkezi (MQM), bu aqqında haber berdi.
"Esas şey – duşman, yarımadanıñ işğal ceryanında rus askerleriniñ rolüni añlatmaz. Böylece, usul kitabına köre, ukrain ükümetiniñ siyasetinden sanki memnüm olmağan sadece yerli ealiniñ areketleri, "Qırımnıñ, Rusiye Federatsiyasınen birleşmesi"niñ sebebi oldı", – dep bildirildi.
Şu cümleden, 10-11. sınıflar talebelerine Qırım sakinleriniñ "numayışlar"ını ve olarnıñ "yerli öz-özüni mudafaa taqımları"nı teşik etmeklerini añlatalar. Aynı zamanda balalarğa böyle degen "yeşilbaş adamçıqlar" – urbada köstergiç işaretsiz rus askerlerini añlatmaylar. 2014 senesi olar, zırhlı tehnika vastasınen Qırım üzerinde kontrol aldılar.
MQMniñ hulâsa çıqarğanına köre, böyle usulınen rus tecavuzcıları, tarihnı daa bir kere yañıdan yazalar, Qırım yarımadasınıñ "göñülli" işğali aqqında propaganda laflarına uyğun olmağan vaqialarnı ondan çıqaralar.
Telegram, Viber ve Facebookta Suspilne qırım haberlerine abune oluñız
