İşğalciler tarafından tutulğan ve 8,5 senege maküm etilgen Ukraina Arbiy-deñiz quvetleriniñ sabıq birinci ranglı kapitanı, "Slavutıç" gemisiniñ sabıq komandanı Oleksiy Kıselövni Vladimir vilâyetine etap ettiler. Bundan evel onı mağazda tutanda onıñ qolunı qırdılar.
Onıñ oğlu Artem Kıselöv, Suspilne Qırımğa bu aqqında haber berdi.
"Çoq şey belli degil. Bilemiz ki, o Krasnodarda edi, etap etildi, şimdi ise Vladimir vilâyetinde. Rus "Qırmızı haç", tutulğan vaqıt "Qırmızı haç" vekili olğanına baqmadan, onıñ esirlikte bulunğanını ve maküm etilgenini tasdıqlamaz", — dep añlattı o.
"Slavutıç" gemisiniñ sabıq komandanınıñ oğlu qoştı ki, ruslar, maküm etilgenini tasdıqlamaylar.
Artemniñ sözlerine köre, Kıselöv mağazda tutulğanda RF topraqlarına etap etilmeden evel işğalciler, onıñ qolunı qırğanlar.
"Añlağanıma köre, normal tibbiy yardım etmediler, azaplamağa devam ettiler. Amma şimdi etap ceryanında azaplar aqqında iç bir şey bilmeyim", — dep qayd etti o.
Oleksiy Kıselöv aqqında ne bilemiz
- 2022 senesi oraq ayınıñ 2-sinde işğal etilgen Geniçeskte rus quvetçileri onı tutqan soñ Qırımğa ketirdiler ve SİZOğa oturttılar.
- Kıselövni "Noman Çelebicihan adına batalyonı"nda iştirak etmekte qabaatladılar – Rusiye CQniñ 208. maddesiniñ 2. qısmı. Rusiyede bu teşkilât, terrorcı bir teşkilât olaraq tanındı. Rusiye prokurorlığı, onıñ içün 10 senelik tevqifni talep etti. Bundan ğayrı, ukrain vatandaşını, Qırımnıñ deñiz qurşavında iştirak etmekte qabaaltlaylar.
- Noman Çelebicihan adına batalyonınıñ qurucısı Lenur İslâmov, Oleksiy Kıselövniñ oñ ait olğanını red etti.
- Kıselöv, Geniçeskte azaplarnı añlattı. 5 kün devamında onı ura ve azaplay ediler, onıñ partizan areketiniñ reberi olğanını kamerağa aytması içün.
- 2022 senesi ekim ayınıñ 27-sinde ADQniñ sabıq kapitanı, tutulğan adamnıñ ekimge ketme hitaplarına baqmadan eki ay devamında tibbiy yardım almağanı içün açlıq başladı. Bu, eñ az altı halqara anlaşmanın boza.
- 2023 senesi kiçik aynıñ 17-sinde Canköydeki işğal makemesi, Kıselövni 8,5 senege maküm etti.
- Arman ayınıñ 22-sinde Qırımdaki işğal Apellâtsiya makemesi, ükümini deñiştirmemege qarar berdi. Qorçalayıcı taraf, bu qararnı lâğu müessisesinde davalaşmağa planalştırır.
Telegram, Viber ve Facebookta Suspilne Qırım haberlerine abune oluñız
