Bugün ekim ayınıñ 4-ünde Qırımdaki işğal Yuqarı makemesinde jurnalist Serhiy Tsıpihanıñ davasına bağışlanğan daa bir oturış keçirildi. Qırımnıñ işğal "akimiyeti", göñüllini RF CQniñ 276. maddesine mücibi casuslıqta qabaatlay. Qanunsız olaraq tevqif etilgen Ukraina vatandaşı içün işğal prokurorı, 19 senelik tevqifini soradı.
Serhiy Tsıpihanıñ apayı, Suspilne Qırımğa bunı añlattı.
Şu anda Serhiy Aqmescitteki işğal 2. SİZOda buluna. İşğalciler, sanki casuslıq içün onı maküm eteler. 4 qapalı oturış endi keçirildi, olardan soñ işğal makemes, üküm çıqarmalı. Advokatnıñ sözlerine köre, Serhiy Tsıpiha içün prokuror 19 senelik tevqifini sorağan.
Serhiy Tsıpiha jurnalist, faalci ve ATO veteranıdır. Rusiyeniñ tolu miqyaslı tecavuzından berli göñülli faaliyet yapa, Ukrainanı destek etken numayışlarda iştirak ete ve işğalcilerniñ cenüpteki areketleri aqqında malümat aydınlata edi. 2022 senesi saban ayınıñ 12-sinde ruslar, jurnalistni hırsızladılar.
"Onıñ aqqında tek çiçke ayında ögrendim. Bütün bu vaqıt devamında bir şey ögrenmege tırışa edim. Er keske telefon ettim, er keske yazdım, dostlarıma, tanışqanlarıma, bizim Nova Kahovka şeerimizniñ merine. Ve o zaman bilesiñizdir, özüm içün men böyle de tüşündim, böyle duyğuma, nasıldır intuitsiyama köre Serhiyni Qırımğa ketirdiler", — dep Olena ayttı.
ZMINA İnsan aqları merkeziniñ insan aqları mesleatçısı Nataliya Ohotnikova, hırsızlanğanı künden berli Serhiyniñ davası üzerinde çalışa. Aqrabalarınen beraber olar, o vaqialarnı yarattılar.
"Birazdan onıñ telefonı, başqa iştirakçilerge beyanat yollamaq içün qullanıldı. Başqa faalciler ve jurnalistlerge. Yani onıñ telefonı vastasınen başqa insanlar davet etilgen. Sanki o, körüşmege añlaşmağa tırışqan edi. Faqat bu, sadece bir qapqan edi", — dep uquq imayecisi qayd etti.
Belli oldı ki, b,daa bir Kahovkalı jurnalist Oleh Baturin, aynı "qapqan"ğa oğradı.
Suspilne Qırımğa tefsir etkende o añlattı ki, uzun zamandır Tsıpihanı tanıy. Ondan maşna stantsiyasında körüşüv aqqında beyanat alğan soñ fena duyğusına baqmadan razı oldı.
"Saat 5te maşna stantsiyasına kelip, anda ukrain nomerasınen beyaz miniven, işaretsiz vatandaşlarnı kördim, amma ög yerlerde oturğan insanlarnıñ endamı, Serhiy Tsıpihanıñkine beñzemey edi ve men keri evge kettim, amma bu minivenden biriniñ engenin ve tarafıma qoşmağa başlağanını eşittim ve añladım ki, er şey bitti", — dep Baturin añlattı.
İşğalciler, Herson vilâyet devlet memuriyetiniñ binasına Oleh Baturınnı ketirdiler, anda ertesi künü başında maskanen oturğanda başqa reineler aralarında Serhiy Tsıpinniñ sesini eşittim. O, soratuv ceryanında adını ayttı.
Serhiy Tsıpiha aqqında ne bilemiz
Serhiy Tsıpiha, bir buçuq sene evel işğalciler tarafından tutulıp esir etilgen Nova Kahovkalı jurnalist ve yazıcıdır. Faal ukrain taraflı nazar noqtası ve jurnalist faaliyeti sebebinden onı tuttılar. Onıñ ğayretlerinen şeerde cemiyetniñ boysunmamasına bağışlanğan kütleviy tedbir keçirildi. Bundan ğayrı, Tsıpiha göñülli faaliyetni yapa, insanlarğa aş ve ilâçlarnen yardım ete edi.
O tutulğan soñ onen bağlantı bozuldı ve uzun zaman devamında aqrabaları, onıñ ne yerde olğanını ve nasıl duyğanını bilmey ediler. Birazdan olar, rus televiziyonında kösterilgen propaganda videosından ögrendiler ki, o canlı ve esirlikte buluna.
Telegram, Viber ve Facebookta Suspilne Qırın haberlerine abune oluñız
