Ukraina Tış işleri nazirligi, qanunsız olaraq maküm etilgen Ukraina vatandaşları olğan Qırımtatar Milliy Meclisiniñ Başınıñ birinci muavini Nariman Celâlovnıñ ve Aziz ve Asan Ahtemovnıñ vaqtınca işğal etilgen Qırımdan RFa mecburiy etap etilmelerini ciddiy tarzda takbih ete.
Nazirlikniñ matbuat hızmeti, bu aqqında haber berdi.
Ukraina TİN, BMTnıñ Baş Assambleyasınıñ 20222 senesi ilk qış ayındaki rezolütsiyasını hatırlattı. O, Qırımda qanunsız olaraq tutulğan Ukraina vatandaşlarını azat etmege talap ete.
"Sahte qabaatlarğa mücibi 2021 senesi berim ayında işğal memuriyetiniñ quvet müessiseleri tarafından üç adam tutuldı. Aynı sene küz mevsiminde Nariman Celâlov ve Ahtemov ağaları, yapmağanları cinayetlerde qabaatlandılar", — dep bildirildi.
Nazirlik qayd etti ki, yarımadada qırımtatarlar, işğal akimiyetiniñ "repressitalarınıñ esas qurbanlarından biri" oldılar, olardan yüzlerce insan "qavmiy, siyasiy, diniy sebeplerden çeşit-türlü taqipler yaşadı".
"Halqara cemaat ve Ukrainanıñ ortaqlarını, şu cümleden Qırım platforması çerçivesinde, Qırımda rusiye işğal akimiyeti tarafından qanunsız olaraq epis etilgen bütün ukrain vatandaşlarınıñ acelen azat etilmeleri maqsadınen Rusiyege tesir etmege devam etmege ve Ukraina vatandaşlarınıñ taqiplerine ait olğan vazifeli insanlarğa dair yañi sanktsiya sıñırlamalarını kirsetmege çağıramız", – dep nazirlik bildirdi.
Nariman Celâlov ve Ahtemov ağaları aqqında ne bilemiz
- Nariman Celâlov, 2016 senesi Rusiye tarafından "aşırıcılıq teşkilâtı" olaraq tanınğan Qırımtatar Milliy Meclisiniñ başınıñ muavinidir. Aziz v Asan Ahtemov, qırımtatar faalcileridir.
- Anğara (Perevalnoye) köyündeki gaz borusını patlatmaqta şübege mücibi berim ayınıñ 3-ü ve 4-ünde Aqmescit ve Kezlev şeerlerinde beş qırımtatar adamı tutuldı – Eldar Odamanov, Aziz ve Asan Ahtemov, Şevket Useinov ve Qırımtatar Milliy Meclisiniñ başınıñ muavini.
- Berim ayınıñ 6-sında işğal "makeme"si, tutulğan qırımtatar adamlarını tevqif etti.
- 2022 senesi berim ayınıñ 21-inde böyle degen Qırım yuqarı makemesi, Qırımtatar Milliy Meclisiniñ başınıñ birinci muavini olğan Nariman Celâlovğa, içtimaiy jurnalist olğan Asan Ahtemovğa ve eki domuş ağası Aziz Ahtemovğa üküm çıqardı.
- Celâlov, şeddetli rejimli müstemlekege 17 senege maküm etildi, 700 biñ rublelik para cezası ve 1,6 senelik ketme sıñırması berildi.
- Asan Ahtemov 15 senege maküm etildi, 500 biñ rublelik para cezası ve 1 senelik ketme sıñırması berildi.
- Aziz Ahtemov 13 senege maküm etildi, 500 biñ rublelik para cezası ve 1 senelik ketme sıñırması berildi.
- 2023 senesi bozarğan ayda Qırımtatar Milliy Meclisiniñ başı Refat Çubarov bildirdi ki, Aqmescitteki 2. SİZOnıñ memuriyeti, Celâlov ve Ahtemov ağalarına qarşı maneviy ve bedeniy şekilde azaplay.
Telegram, Viber ve Facebookta Suspilne Qırım haberlerine abune oluñız
