Qapalı oturışta Moskvadaki Lefortovskıy makemesi, Rusiye tarafından "casuslıq"ta qabaatlanğan qırımtatar Leniye Umerovanıñ tevqif müddetini daa üç ayğa – 2024 senesi qara qış ayınıñ 4-üne qadar uzattı. Bu, onıñ içün qorçalayıcı tedbiriniñ müddetiniñ üçünci uzatılmasıdır. Umerova, deñiştirilecegine ümüt ete.
Umerovanıñ advokatı Olha Dinze, Suspilne Qırımğa bu aqqında haber berdi.
"Bugün taqiqat makemesiniñ ricasınen, Leniyeniñ qorçalayıcı tedbiriniñ müddetini daa 3 ayğa, umumen 8 ayğa, yani 2024 senesi qara qış ayınıñ 4-üne qadar uzattı. Leniyeniñ bedeniy alı yahşıdır, ruhiy alı da stabil. SİZOda Leniye çoq oquy, yoga yapa, yani vaqıt faydanın keçire. Deñiştirilecegine ümüt eterek yaşay", – dep Dinze añlattı.
Makeme oturışı qapalı edi, çünki anda devlet sırı olğan bilgiler bildirilecektir. Advokat, SOTA mühbirine tefsir etkende ayttı ki, taqiqatçınıñ makemege bergeni bilgiler, operativciler ve taqiqatçılar aqqında bilgilerde ğayrı, sır olmağanlardır.
"Qorçalayıcınıñ fikrince, üç ay içinde taqiqatçılar, makemeden evelki taqiqatnı bitirmeycekler ve taqiqatçı, Umerovanıñ tevqif müddetiniñ uzatılması aqqında rica etecek. Bu davadaki araştırmalar alâ daa tesbit etilmedi ve keçirilmedi. Qorçalayıcı tarafqa makemeden evelki taqiqatnıñ vaqıtınıñ uzatılması nenen bağlı olğanını añlatmadılar", – dep bildirildi.
UPD: Qırımtatar qızınıñ ağası Aziz Umerov, Suspilne Qırımğa añlattı ki, onıñ davası gizlengendir, buña köre tanışuv içün qabaatlayıcı tarafnıñ dava ceryanının bağlı vesiqaları yoq. Advokat ise malümat birdirmeme şeadetnamesini imzaladı, bunıñ içün de aqrabaları, Umerova aqqında haberler alamazlar.
"Şimdi oña qırımtatar tilinde mektüplerni yazmamağa rica etti, çünki onı destek etken çoq faalci ve adiy insan oña yazalar. Olardan çoqusı Qırımdan kete. Ve o, Qırımdan qırımtatarca yazmamağa rica etti. O raatsızlana ki, bu, onıñ ayatını zorlaştıra bilir, ve bu tür mektüplerni yazğan insanlar içün de telükeli ola bilir", – dep Aziz Umerov qayd etti.
Bundan ğayrı, o tafsilâtlıca añlattı ki, soñ mektüplerine köre, mümkün olğance o, özüni yahşı duya ve keyfini tutmağa tırışa.
"Bir kişilik kameradaki 10 aylıq tevqiften soñ insan ne duyğanını bilmeyim, amma qız qardaşım, büyük cesaret, dayanıqlıq ve qaramanlıq misalini köstere", – dep Umerovanıñ ağası qayd etti.
Leniye Umerova aqqında ne bilemiz
- 2022 senesi ilk qış ayından berli Rf akimiyeti, 25 yaşındaki qırımtatar Leniye Umerovanı qanunsız olaraq tuta edi. Oña qarşı bir qaç memuriy protokol tizdi. Birinci kere sanki vesiqalarını bermegen, bundan soñ sanki telefonını bermegen, bundan soñ da sanki "masadan çıqmağan ve qarşılıq köstergen".
- Bozarğan aynıñ 30-ında Moskvadaki Lefortov makemesi, Ukraina vatandaşı Leniye Umerovanıñ tevkif müddetini 2023 senesi ekim ayınıñ 4-üne qadar uzattı.
- Suspilne Qırım, Leniyeniñ ağası – Aziz Umerovnen laf etti. O, RF tarafından tek ukrain pasportına saip olğanı ve rusiye pasportını almağa red etkeni içün maküm etilgen qız qardaşınıñ ikâyesini añlattı.
- Qırım uquq qorçalayıcı gruppasınıñ başı Olha Skrıpnık, qırımtatar Leniye Umerovanıñ RFdaki izolâtorda tevqif müddetleriniñ uzatılması içün sebeplerni añlattı. Bundan ğayrı, uquq qorçalayıcı qıznı işğalcilerni azat etmege ve evine qaytarmağa yardım etecek yollarnı añlattı.
- Quralaynıñ 5-inde Moskvadaki Lefortov rayon makemesi, ruslarnıñ Şimaliy Osetiyada 5 ayğa qanunsız olaraq tevqif etkeni qırımtatar Leniye Umerovanı epis etti. Leniye Umerovanıñ qorçalayıcıları, qorçalayıcı tedbirniñ miqdarını iddialaşmağa planlaştıralar.
Telegram, Viber ve Facebookta Suspilne Qırım haberlerine abune oluñız
