2021 senesi başından berli işğal etilgen Qırımda işğal müessiseleriniñ, şu cümleden "makemeler"niñ, binaları yanında eñ az 10 kütleviy tutuvlar dalğası oldı. Bu sene üç bu tür tutuv oldı.
"QırımSOS" içtimaiy uquq qorçalayıcı teşkilâtı bu aqqında haber berdi.
2021 senesi Qırımda kütleviy tutuvlar
Berim ayınıñ 4-ünde tutulğan qırımtatarlarnı (şu cümleden, Qırımtatar Milliy Meclisiniñ başınıñ ilk muavini Nariman Celâlnı) destek etmege kelgen eñ az 60 insan Aqmescitteki FSB binası ögünde tutuldı. İşğalciler, 58 memuriy dava tizdiler. 24 Qırım sakini "maska rejimini bozğanı içün" 5 - 30 biñ rublelik para cezasını aldı. Ekim ayınıñ 11-inde işğal politsiyası, "Hizb ut-Tahrir davası"nıñ Krasnohvardiyska gruppasına dair makeme oturışınıñ neticeleri bildirilgende "makeme" ögünde toplanan 20 qırımtatar faalcisini tuttı. Yedi insanğa 5-20 biñ rublelik para cezasını berdi.
Ekim ayınıñ 25-inde "Hizb ut-Tahrir davası"nıñ Krasnohvardiyska gruppasınıñ oturışınıñ yayınlanğanı işğal makemesi yanında 21 insan tutuldı. Olarğa qorçalayıcılarnı yibrmey ve "politsiya işçisiniñ qanuniy emrini riayet etmegeni içün" memuriy protokol tizmege qorquta ediler. Tutulğanlar aralarında advokat Edem Semedlâyev edi. Birazdan "politsiya işçisiniñ qanuniy emrini riayet etmegeni içün" onı 12 künge tevqif ettiler. 14 insan 10-15 biñ rublelik para cezasını aldı.
Ekim ayınıñ 29-ında "politsiyacılar", "Hizb ut-Tahrir davası"nıñ üçünci Bağçasaray gruppasınıñ iştirakçilerine üküm çıqarılğanı "makeme" ögünde toplanğan 31 qırımtatar faalcisi ve içtimaiy jurnalistni tuttılar.
Boş aynıñ 1-inde "Hizb ut-Tahrir davası"nıñ Krasnohvardiyska gruppasına dair makeme oturışınıñ neticelerini ögrenmek içün "makeme" binasına kelgen 19 qırımtatar faalcisi tutuldı. Sanki karantin şartlarını bozğanları içün 12 qırımtatar, 8-15 biñ rublelik para cezasını aldı.
Boş aynıñ 23-ünde 12 künlik memuriy tevqiften soñ çıqqan advokat Edem Semedlâyevnen körüşüv vaqtında 31 insan tutuldı. Tutulğanlar aralarında qadınlar ve balalar bar ediler. İşğalciler, 21 insannı 10-14 künge tevqif ettiler ve on insanğa 10-15 biñ rublelik para cezasını berdiler.
2022 senesi Qırımda kütleviy tutuvlar
Kiçik aynıñ 18-inde işğal Bağçasaray rayon makemesi binası yanında Qurultaynıñ tutulğan vekili Edem Dudakovnı destek etmege kelgen 15 qırımtatar tutuldı. Ertesi künü "makeme" olarğa 10-12 biñ rublelik para cezasını berdi.
2023 senesi Qırımda kütleviy tutuvlar
Qara qış ayınıñ 25-inde Canköy rayonındaki tintüvler dalğasından soñ tutulğan altı qırımtatar adamınıñ davasınıñ diñlenmesinde Aqmescitteki "Kıyiv rayon makemesi" binası ögünde 34 insan tutuldı. Yedi tutulğan insannı azat ettiler, eki gruppalı saqatlı insan 20 biñ rublelik para cezasını ödemeye mecbur qaldı, başqalarını ise 10-16 künge tevqif ettiler.
Oraq ayınıñ 27-sinde Nariman Celâl ve Aziz ve Asan Ahtemovnıñ davasınıñ şikâyet diñlenmesi vaqtında Aqmescitteki "Qırım Yuqarı makemesi" binası ögünde 14 insan tutuldı. Tutulğan insanlar aralarında siyasiy mabüslerniñ azaları, jurnalistler Kulemet İbrayimov ve Lütfiye Zudiyeva ediler. Sanki "cemaat yerlerinde vatandaşların aynı zamanda kütleviy bulunmalarında iştirak etkeni içün" İbrayimovnı 5 künge tevqif ettiler, Zudiyeva ve daa üç insanğa 12-15 biñ rublelik para cezasını berdiler.
Arman ayınıñ 25-inde Aqmescitteki "Kıyiv rayon makemesi" binası ögünde Bağçasaray rayonındaki tintüvlerden soñ tutulğan altı qırımtatarnı destek etmege kelgen 22 insan tutuldı. Olarnı 1-7 künge tevqif ettiler.
Telegram, Viber ve Facebookta Suspilne Qırım haberlerine abune oluñız
