Cuma künü, boş aynıñ 13-de işğal etilgen Sevastopolda (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adda) elektrik teminatı ile bağlı meseleler sebebinden trolleybuslar areketi toqtatıldı. Bundan da ğayrı, şeerde elektrik energiyasını berüv cedveli lâğu etildi, çünki küç yetmey.
«RİA Novosti Krım» «Sevastopolenergo» ve şeer naqliyat departamentiniñ işğalli müessiselerine esaslanıp, bunı bildirdi.
«Sevastopolda elektrik energiyasını berüv cedvelleri lâğu etildi — şeerge kelgen küç yeterli degil. İçtimaiy obyektlerni yedek bağlav shemalarına keçirdiler», — dep bildire agentlik.
Sevastopolda (Aqyarda) trolleybuslar çalışmay
Şeerde elektrik meseleleri sebebinden trolleybuslar vaqtınca çalışmay. Bir qısmında olar avtobuslarğa deñiştirildi.
«5, 7, 10, 12, 14 ve 20 nomeralı trolleybus marşrutlarında avtobuslar vaqtınca çalışıp başladı. 20, 23*, 24, 30, 72, 79 ve 92 nomeralı avtobuslar da vaqtınca marşrutlarğa çıqmadı», — dep qayd etildi haberde.
Elektrik energiyasınıñ söndürilüvi aqqında Yaltada da haber etile, dep yaza «Krımskiy vetr».
«Strategiya XXI» globalistika merkeziniñ prezidenti, energetik mütehassısı Mıhaylı Ğonçar, Suspilne Qırımğa, Qırımda elektrik teminatı ile bağlı meseleler sistematik olğanını añlata.
Onıñ aytqanına köre, Rusiye işğaline qadar yarımada kerekli elektrik energiyasınıñ çoqusını qıtaiy Ukrayinadan ala edi.
Mıhaylo Ğonçar qayd ete ki, ukrayinlerniñ Rusiye işğalli ordusı tarafından qullanılğan energetik astyapığa ücümleri yarımadanıñ elektrik teminatı vaziyetine de tesir etti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız

