İşğal etilgen Qırımda Rusiye akimiyeti daa üç vatandaş müessisesini 'terrorizmge qarşılıq kösterüv' sebebinden siyasiy ve içtimaiy-iqtisadiy esnaslarnı nezaret etmege mecbur etti. Bundan da ğayrı, olar ola bilecek zıddiyetlerniñ sebeplerini yoq etmek içün tekliflerni bekleyler. Soñki üç ay içinde doquz idareci böyle vekâlet aldı.
The Insider Qırımnıñ işğalci ükümetiniñ qararlarına esaslanıp bu aqqında bildire.
Bu Devlet veterinariya komiteti, Emek ve içtimaiy qoruv nazirligi ve İqtisadiy inkişaf nazirligi ola. 699, 697 ve 703 sayılı mütenasip qararlarda işğalci akimiyet tarafından «terrorizmge qarşı vaziyetke tesir ete bilecek» esnaslarnı nezaret etüvde bu müessiselerniñ iştiragi közde tutula.
Devlet veterinariya komitetinden, hususan, Rusiye akimiyetiniñ versiyasına köre, 'terroristik areketlerge' ve 'terrorizmniñ içtimaiy bazasınıñ şekillenmesine' yardım ete bilecek zıddiyetler içün şartlarnı yoq etüv boyunca tekliflerni azırlaması beklenile. Aynı talaplar eki nazirlik içün de qoyuldı.
Rusiye akimiyeti böyle vekâletlerni Qırımnıñ vatandaş müessiselerine 2026 senesiniñ yazından berli bere. Oraq ayında terrorizm ile küreş sebebinden siyasiy esnaslarnı nezaret etmek içün sanayı ve ticaret nazirligi, avgust ayında içki siyaset, malümat ve bağ nazirligi ve fevqulâde vaziyetler nazirligi vazifelerini aldılar.
Berim ayında bu cedvelge Milletlerara munasebetler boyunca Devlet komiteti, Gençlik siyaseti boyunca Devlet komiteti ve Adalet nazirligi qoşuldı.
Bu kibi vekâletlerniñ kenişletilmesi ile, Qırım uquq qoruyıcı gruppasınıñ malümatına köre, 2026 senesiniñ başından işğal etilgen Qırımda 'devlet hainligi', 'terroristik faaliyet' ve 'patlayıcı maddeler ile qanunsız areket etüv' qabaatlavları boyunca eñ azından 28 üküm qayd etildi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
