Anonymous adlı haker taqımı işğal etilgen Qırımda Rusiye mahkeme sistemasınıñ bozuluvı aqqında bildirdi. Hakerlerniñ aytqanlarına köre, olar malümat bazalarına kirip, 323 biñ fayldan ibaret olğan 240 GB malümatnı hırsızladılar.
Qırımtatar resurs merkezi bunı bildirdi.
Anonymous öz beyanatında Rusiyeni Ukrayinadan ordularını çıqarmağa çağırdı ve Qırım Ukrayinanıñ qısmı olğanını qayd etti.
Taqım tarafından derc etilgen skrinşotlardan añlaşılır ki, hakerler tarafından qullanılğan resurslar arasında «Qırım Cumhuriyeti Barışıq mahkemecileri» portalı bar. O, yarımadada Rusiye işğalli mahkeme sistemasında çalışa.
QRMniñ qayd etkenine köre, soñki aylarda işğalli akimiyetniñ vekilleri Rusiye kontrolindeki «Qırım Cumhuriyeti devlet şurası» vastasınen barışıq «mahkemecileri»niñ «tekrar saylavı» protsedurasını keçirdiler. Hususan, Çornomorskıy rayonı, Yalta şeerinde ve diger meskün yerlerdeki «mahkemeciler» aqqında söz yürsetile.
Qırımtatar resurs merkeziniñ malümatına köre, bu esnaslar etrafında qabarcılıq añlaşmaları ve resmiy olmağan ödemeler peyda ola bile edi. Merkezniñ qayd etkenine köre, işğalli mahkeme sistemasınıñ bazı vekilleri, «yañıdan saylanmağa» yardım etmek içün talap etilgen para miqdarınıñ artqanından şikâyet ete ediler.
Anonymous — merkeziyleştirilmegen halqara haker areketidir, onıñ yekâne hiyerarhiyası, daimiy azaları ya da resmiy reberligi yoq.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
