Qırımtatar siyasiy mabüsi Memet Belâlovnı ruslar daa bir kere, üç aydan soñ, Petrozavodsktaki (Kareliya Cumhuriyeti) №9 tüzetüv koloniyasınıñ kamera kibi binasına, sert tutuv şaraitlerindeki barakqa avuştırdılar.
Siyasiy mabüsniñ tuvğanları bu aqqında bildirdi.
Belâlov üç ay kamerada tutuldı, soñ onı kene sert şaraitlerge avuştırdılar, anda endi bir yıldan ziyade tutula — koloniyağa 2025 senesiniñ yazında kelgeninden berli.
Ailesi aytqanına köre, aqayğa telefon etmege yasaq eteler, onıñ içün bütün bu vaqıt devamında tek mektüpler vastasınen laf eteler. Aileden kelgen mektüpler ve cevap mektüpleri pek uzun vaqıt baqıla, çünki VK-9da şimdi tek bir muarrir bar. Bütün mektüplerni o, berim ayınıñ 25-nde, eki aftadan soñ aldı.
Qorantalar qayd etkenine köre, aqaynıñ işleri aqqında tafsilâtlıca soraycaq mektüpler oña berilmey.
«Ana, men sizge bir qaç mektüp yolladım. Cevap bermeysiñiz». Men de ayttım: «Senden bir mektüp almadım», — 2025 senesi siyasiy mabüsniñ anası dey edi.
Memet Belâlovnıñ ağır şaraitlerde bulunması sebebinden oña işke çıqmağa yasaq etile.
Bundan evel o, öksürik ve ayaq ağrılarından şikâyet ete edi, onıñ aytqanına köre, bu, kamera başında qıyın oturğanınen bağlı edi. Tuvğanlarınıñ aytqanına köre, koloniyada qırımtatarı pek zayıf, amma şimdi kene de biraz kilo ala. Onıñ aytqanına köre, belli olmağan sebeplerden qorantası yollağan tıbbiy yardımnı daa almadı.
Hizb ut-Tahrir – islam siyasiy fırqası. 2003 senesi Rusiyede onı terroristik teşkiyatı kibi tanıdılar, oña ait olğanlarını ise taqip etmege başladılar. İştirakçılarnı «qabarcılıqqa qarşı faaliyetinde» ve «dünyaara hilâfet» degenini teşkil etmege ıntıluvında qabaatlaylar. 2014 senesi Qırımnıñ işğalinden soñ işğalciler zapt etilgen Qırımğa öz qanunnamesiniñ areketini tarqattılar. Böyleliknen, yarımadanıñ işğalinen razı olmaması içün qırımtatarlarına basqısını quvetleştirip, Hizb ut-Tahrir-ge alâqasında qırım musulmanlarnı da qabaatlamağa başladılar.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
