İşğal etilgen Qırımda berim ayınıñ 23-nde yağğan yağmurlar neticesinde bir qaç şeerniñ soqaqları suv astında qaldı. Eñ çoq yağanaqlar Bağçasaray rayonında yağdı. İşğalciler yarımadanıñ cenübiy yalısında ve dağlarda kündüz şiddetli yel aqqında tenbiyelediler.
Qırım ükümetiniñ Fevqulâde vaziyetler nazirliginiñ matbuat hızmeti bildirgeni kibi, berim ayı 23-24-de yarımadada yağmur, bazı yerlerde küçlü yağmur ve furtuna beklenile. Aynı zamanda yel süratı 20-25 metrge qadar artacaq.
Berim ayınıñ 23-nde bir qaç şeerniñ soqaqları suvnen toldı. Hususan Yevpatoriya ve Aqyarda (SevastopoldaRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) maşinalar suv astına tüşti. Aluştada Volodımır Hromıh soqağındaki maşnanıñ damı tüşti, yol areketi qısmen qapatıldı, dep «mer» Ğalına Oğneva bildirdi, dep RİA Qırım Haberler agentligi bildire.
İşğalci Fevqulâde vaziyetler nazirliginiñ malümatına köre, bugün eñ çoq yağanaqlar Bağçasaray rayonında yağdı. Yarımada boyunca eñ küçlü yel süratı 15 m/s oldı. Farqlı rayonlarda yağğan yağanaqlarnıñ miqdarı:
- Qara-Dağ — 44 mm,
- Biloğirskıy — 43 mm,
- Anğar boğazı ve Ay-Petri — 35 mm,
- Yalta — 26 mm,
- Aluşta — 24 mm,
- Aqmescit rayondaki — 18 mm,
- Leninskiy — 15 mm,
- Sudaq ve Feodosiya — 9 mm,
- Kezlev — 7 mm,
- Nıjnöğirskiy — 5 mm,
- Çornomorskıy ve Razdolnenskıy — 4 mm.
Qırımnıñ Cenübiy yalısında ve dağlarında 35 m/s tezliginde furtunalı yeller ücüm ete.
Bundan da ğayrı, Kefede bir sıra soqaq yarıqsız qaldı. İşğalci «Qırımenergo» şirketi yüksek seviyeli azırlıq rejimini ilân etti ve yarımada boyunca yarıqnıñ kesilüvini tahmin ete.
Rusiyeniñ gidrometeorologik merkezinde RİA Qırım Haberler agentligine bildirdiler ki, Belogirskte aylıq yağanaq miqdarınıñ 120% endi yağdı. Bir az da eksik — Qara Daq ve Köktebelde — 95%. Yaltada aylıqnıñ 60% qayd etildi, Angara keçitinde — 70%. Aylıqnıñ yarısı Bağçasaray rayonınıñ Poşva köyünde ve Ay-Petri köyünde tüşti.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
