İşğalli Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) akimiyeti «Gidrotehnik» mülk saipleriniñ cemiyetinden Monastır ve Balıqlava şossesi arasında yañı yol qurulması içün topraq damartılarını ala. Üç topraq ve bir mesken ev aqqında söz yürsetile.
İlk küz ayınıñ 16-nda şeer «gubernatorı» Mihail Razvojayev bu qararnı imzaladı, dep bildirdi ilk küz ayınıñ 21-nde ForPost yerli teşviqiy neşiri.
Rusiye Federatsiyasınıñ Krasnodar ülkesinden «Trakt» şirketi azırlağan aman-aman bir kilometrlik yol leyhası 2023 senesi tasdıqlandı. Ruslarnıñ aytqanlarına köre, o, yerli sakinler arasında «Oğirok» olaraq belli Balıqlava şossesiniñ 5-inci kilometrinde naqliyat yolunı boşatmaq kerek.
Faqat, leyhanıñ ömürge keçirilmesi sakinlerniñ qarşılığını doğurdı, dep yaza neşir. Topraq saipleri, bu olarnıñ yekâne mesken yerleri olğanını aytalar, ve evler tutıp alınmasın dep, sıñırlarnı yañıdan baqmağa rica eteler.
«Bu topraq damartısında, bu leyhada qayd etilmegen ve menim bütün yıl devamında yaşağan yekâne mülküm olğan büyük qurucılıq obyekti (meskün ev) bar», — dep tarif etti sakinlerden biri.
Sevastopollılar (Aqyarlılar) ekologik telükelerge de diqqat ayırdılar. Şu cümleden, yol, unikal bir çöl — Qızıl kitapqa kirsetilgen tupolizim fıstıq olğan çölden ve yüksek basım gaz borusından keçe bile. Leyhada bu aqqında iç bir şey aytılmay, dep yazalar teşviqatçılar.
Bundan ğayrı, işğalciler, cemiyetniñ elektrik teminatına bağlı olğan kabel ve transformator stantsiyasınıñ köçürilüvi meselesini çezip olamadı.
Aynı zamanda, çoqusı şikâyetlerge baqmadan, işğalli memuriyet saylanğan yolunıñ «eñ optimal» olğanını ve olarnıñ fikirince, rayon inkişaf planlarına uyğanını bildirdi.
Bundan evel işğalli Qırım akimiyeti «Simferopol — Yalta» yolunıñ rekonstruktsiyası içün topraq damartıları ve mülkniñ ayırılması aqqında qarar aldı, yani «Tavrida» yolunıñ 155-180 km qısmında cenübiy soqağınıñ qurucılığı.
Bundan evel Milliy muqavemek merkeziniñ bildirgenine köre, Qırımda işğalciler, Rusiye akimiyeti tarafından belgilengen qaidelerge köre topraqlarnı resmiyleştirgen yerli sakinlerniñ evlerini ve topraqlarını alalar. Hususan, Uyutne qasabasında eñ az 80 qorantanıñ evleri yıqıluv telükesi altında buluna.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
