İşğal etilgen Qırımda Rusiye Devlet Dumasına qanunsız saylavlar keçirilmesine azırlanalar. Yarımadada aman-aman üç million bülletenler bastırıldı, erte saylavlar ise endi başlandı. Saylavlar berim ayı 18-20 künleri keçirilecek.
İşğal etilgen yarımadada yaşağan Ukrayina vatandaşları qanunsız mitinglerde iştirak etmemege çağıralar. Bu aqta Qırım uquq qorçalayıcı gruppasınıñ milliy adliyeci Oleksiy Tilnenko haber etti. Ukrayina akimiyeti böyle saylavlarda iştirak etüv içün mesüliyet aqqında da ihtar ete.
Onıñ qayd etkenine köre, Ukrayina qanunları ayrı areketler içün mesüliyetlikni belgiley.
''İşğal etilgen topraqta insanlar mecburen buluna. Diger taraftan, añlamaq kerekmiz ki, Cinayet Kodeksi bar ve vatandaşlarımıznıñ vaqtınca işğal etilgen topraqta yapqan bazı areketleri bu Cinayet Kodeksiniñ mahsus maddelerine, yani kollaboratsionizmge tabi ola'', — Tilnenko dedi.
Ukrayina Tış işler nazirliginiñ spikeri Georgiy Tihiy, vaqtınca işğal etilgen topraqlarda Rusiye Federatsiyasınıñ saylavlarında iştirak etüv içün ecnebiylerniñ mesüliyeti aqqında tenbiyeledi.
O, rey berüv qanunsız olğanını ve onıñ neticeleri Ukrayinada uquqiy küçke saip olmağanını bildirdi.
''Rusiye tarafı bu maskaralıqnı, bu rey berüvni, hususan VİETda keçirmek niyetinde olğanı içün, er kesni böyle areketler içün mesüliyetke çekilüvi aqqında evelden tenbiyeleyik. Bu rey berüv qanunsızdır, neticeler boş olacaq, bu farsqa qoşulğan er kes Ukrayina qanunlarına köre mesüliyetke çekilecek'', — Tıhıy dedi.
Rusiye Federatsiyasınıñ Devlet Dumasına rey berüvniñ esas künleri berim ayı 18-20 künleri keçirilecek. Aynı zamanda işğalci memuriyet sahte saylavlar vaqtında elde etmege planlaştırğan köstergiçlerni belgiledi.
RNBO yanındaki Dezinformatsiya ile küreş merkeziniñ malümatına köre, saylayıcılarnıñ eñ azdan 65% faalligi ve «Yedinaya Rossiya» firqasınıñ eñ azdan 70% destegi aqqında söz yürsetile.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
