19 yaşındaki Yevpatoriyalı (KezlevRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki adli) Matviy ve Qurman rayonından kelgen 18 yaşındaki Darya işğal etilgen yarımadadan çıqqan soñ Kıyivde evlendiler. Çift, ekisi de anda oquğan Tavriya milliy universitetine vesiqalarnı bergende tanış oldı.
Darya Suspilne Qırımğa eksklüziv şekilde bu aqqında tarif etti.
Darya dey ki, toy künü özü hoş bir şekilde qutlanıldı, ve, yañı çiftniñ işğalden tış yaşağanına baqmadan, bir kimse özüni yañlız duymadı.
«Bütün kün bizni hayırlay, telefon ete ediler, hayırlı künler tilediler. Evel olğanı kibi körüşmege devam etemiz, amma sanki ayaqlarıñnıñ altında topraq bar, bir insannı işanmaq mümkün, şimdi etrafımızdaki er kes içün biz resmen evlimiz, qorantamız ve er kes buña ciddiy yanaşa. Bir-birimizniñ yanımızda olğanımızda, evimiz kibi duyamız», — dep tarif etti yañı evli qız.
Darya, bayram ananeviy aşlarnen qırımtatar restoranında keçkenini ayta.
Çift Tavriya universitetinde oquğan vaqıt tanış oldı. Matviy vışıvanka kiygen edi ve ukrayin tilinde laf ete edi. Olar subetleşe, beraber resim yapa ediler ve yavaş-yavaş yaqınlaşa ediler. Bu yaz olar içün bir işaret oldı. Matviya siyasiy ilimlerni, Darya ise ruhiyatnı ögrene.
Evel Suspilne Qırım onıñ aqqında tarif etti: 19 yaşındaki Matviy Yevpatoriya (Kezlev) şeerinde doğdı, tolu miqyaslı istilâ başlanğan soñ ise öz başına ukrayin tilini ögrenmege ve Qırımdan çıqmağa azırlanmağa qarar berdi. Ukrayina sıñırından keçken soñ, pasportnı aldı, universitetke kirdi ve sevgilisi ile tanış oldı. İşğal altındaki yaşayış ve serbest topraqta ilk aylar aqqında — «Bu menim hayal etkenim ayattır»: 19 yaşındaki Qırım sakini 12 yıllıq işğalden soñ Kıyivge köçti» maqalesinde oquñız.
Darya ise iç bir vaqıt ukrayin mektebinde oqumağan edi, 2015 senesi — işğal vaqtında — mektepke kirdi, amma öz başına ukrayin tilini ögrene edi. Bu sene qız Qırımdan çıqıp, Kıyivdeki universitetke oqumağa kirdi. O, mayısnıñ 18-nde Qırımnı terk etti. Sıñırdan keçken soñ o, bu kün qırımtatar halqınıñ genotsid fedalarını hatıra künü qayd etilgenini añladı.
«Men evimni qırımtatar sürgünligini hatıra künü terk ettim», — dep ayta qız.
Darya Ukrayinanıñ serbest toprağında ayatqa yavaş-yavaş alıştı. Qırımnı özlegenini ayta. Oña alışmaq içün yardım etken insanlar bar edi, şu cümleden, Matviy.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
