Qırımtatar uquq qorçalayıcısı ve jurnalisti Server Mustafayev Rusiyede qanunsız apiste olğanda mektüp yolladı. İşğalciler onı qanunsız sürette 14 yılğa mahküm ettiler. Mektüpte o, işğal etilgen Qırımda ruslarnıñ taqiplerinden zarar körgen er keske qol tutqanını bildirdi ve qırımtatarlarnı birlikke çağırdı.
Qırımtatar Resurs Merkeziniñ idare reisi, Qırımtatar Milliy Meclisiniñ azası Eskender Bariyev Facebookta bunı bildirip, siyasiy mabüsniñ mektübiniñ qırımtatar tilinden tercimesini derc etti.
Mustafayev musulman cemiyetine ve qırımtatarlarğa qorantasınen körüşüvde destek ve yardım köstergenleri içün teşekkür bildirdi.
«Pek çoq farqlı haberler bildim bu körüşüvden. Bazıları quvandırdı, ruh berdi, amma elbette devam etken zülüm ve ana yurtımızğa kelgen cenk qoqusı pek raatsızlandıra! Qırımdaki qalğan bir avuç halqıma, kene ve kene ep yañı sınavlar kele başına. Zamanımızğa kelgen müsibetliklerni başımızdan keçirip sağ qalmaq-ağır, amma pek müim em bizge bugün, em kelecek nesillerimizni közde tutıp. Epimiz şaatmız nasıl yañi-yañi lağaplar ve türlü sebepten basqılar tüşti soñki yılları cemaatımıznıñ faalcilerine, cesür oğlan-qızarına. Lâkin yalanğa aldanmayıp, birlikte ve destekleşip-hikmetli çareler ve cevaplar tapamız sağlam qalmaq halq olaraq, Qırımda yaşamaq, din ve urf adetlerimizni kütip inkişaf etmege», — yazdı o, mektübinde.
O, halqını sabırlı olmağa çağırdı ve çiçek ayında onıñ qorantası da cenk aqibetlerinden zarar körgenini ayttı.
«Ebet eki küç talaşqan vaqıtta, adiy insanlar zarar köre. Bugün de haberler kele yurtımıznıñ türlü köşelerinden zarar körgen evler ve insanlar aqqında. Menim evim ve ailem de aprelniñ soñunda özü sezdi ve keçti aynı sınavdan. Bu qorqunçlı imtihannı yengilce keçirmege yardım etti kene sayğılı ve sevgili cemaatım öz destek ve yardımlarnen. Men pek ğururlanam öz halqımnen ve bizlerni arqadaş etken, küç, ruh bergen islam dinimiznen», — yazıldı mektüpte.
Server Mustafayev qırımtatarlarnı «öz toprağınıñ saipleri» olıp qalmağa çağırdı.
«Birciler ayta ketmek kerek dep Qırımdan, lâkin qayda bizni bekleyler? Qayda da bar bizim yurtumız? Qayda daa taparıq destek bergen soy-sop, qomşu ve cemaatnı?», — dep tüşüne o ve qoşa: «Ne qadar sınavlar olup keçti soñki yılları. Ebet bazıları ketti Qırımdan. Eki yüzlü satqınlar belgiledi özüni. Amma halqnıñ esas qısımı devam ete yaşamaqnı ana-vatan Qırımda. Bu künlerni de keçerik itibarlı in şaAllah. Saip olup qalarıq yurtımızda sağlar qalsa temelimiz — birlik, iman ve adetlerimiz».
Server Mustafayev aqqında ne bilemiz
Server Mustafayev, "Qırım birdemligi" cemaat birleşmesiniñ idarecisidir. Qırım siyasiy mabüsleriniñ ailelerine uquqiy, malümat ve içtimaiy-yaşayış ceetinden yardım ete.
2014 senesinden başlap Mustafayev, Qırımdaki vaziyetni muntazam tarzda nezaret ete be siyasiy sebepli makeme ceryanlarını aydınlata edi.
2018 senesi mayıs ayınıñ 21-inde quvetçiler evlerini tintip, Server Mustafayev ve Edem Smayilovnı tuttılar.
2020 senesi berim ayınıñ 16-sında Rostov-na-Donudaki Cenübiy bölge arbiy makemesinde qırım musulmanını 14 senege maküm ettiler.
Saban ayınıñ 14-ünde Vlasisadaki Apellâtsiya arbiy makemesi, qorçalayıcı tarafnıñ şikâyetnamesini baqıp, qanaatlendirmedi. Umumen dava çerçivesinde 45 makeme oturışı keçirildi.
Hizb ut-Tahrir, islâm siyasiy fırqasıdır. 2003 senesi Rusiyede o, terrorcı bir teşkilât olaraq tanındı, oña bağlı olğan insanlarnı ise taqip etmege başladılar. İştirakçileri, «qanunlarğa qarşı faaliyet»te ve böyle degen «cian hilâfeti»ni yaratmağa ıntılmağa qabaatlanalar. 2014 senesi Qırım işğal etilgen soñ işğalcilerniñ qanunları zapt etilgen Qırımda da qullanılmağa başlandı. Qırımlı musulmanlarnı da Hizb ut-Tahrirge bağlı olmaqta qabaatlamağa başladılar, böylece yarımadanıñ işğaline qarşı olğanı sebebinden qırımtatarlarğa basım arttı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
