Rusiye neşriyatlarınıñ 8 yañı kitabı Ukrayinağa qarşı neşirler cedveline kirsetildi. Olardan biri — Qırım aqqında.
Ukrayina televideniye ve radioyayınlav devlet komitetiniñ saytında bu aqqında aytıla.
Devlet teleradiokompaniyası Ukrayina telükesizlik hızmeti ile işbirlikte istilâcı devletniñ neşriyat saasını nezaret etmege devam ete. Monitoring neticelerine köre, Ukrayina mustaqilliginiñ yoq etilmesine, zorbalıq propagandasına, milletlerara, ırq, din duşmanlığınıñ qızdırılmasına, terroristik areketlerniñ yapılmasına, insan aqları ve serbestligine ücüm etüvge doğrultılğan kitap neşirleriniñ cedveli tizile, — dep haberde aytıla.
Arman ayında bu cedvelge 8 yañı ad qoşuldı.
Bu kitaplar, Rusiye neşriyatlarınıñ, hususan sanktsiya altındaki neşriyatlarnıñ, yañı kitaplarıdır. Olarnıñ episi Rusiye Federatsiyasınıñ Ukrayinağa qarşı silâlı tecavuznı aqlamaq ve romantikleştirmek, ukrayin halqını dehumanizatsiya etmek ve ukrayin devletçiligini inkâr etmek içün yapılğan informatsion-psıholoğiyi cenkniñ elementleridir. Yañartılğan cedvelde eñ açıq-aydın ideologik-antiukrain tabiatına ve sistematik teşviqat yönelişine saip olğan üç eser qayd etile», — dep müessisede qayd eteler.
Mıkola Marçuknıñ Qırım aqqında kitabı — « Zадача будет выполнена! Qırım qazanı».
Bu, ukrayin devletliginiñ bütünley yoq etilmesi, Ukrayinanıñ topraq bütünliginiñ bozuluvı ve cenübiy regionlarnıñ işğali çağıruvları olğan sahte-tarihiy ve şovinistik Z-fantastika. Kitapta ukrayinler yoq etilmesi ya da terbiye etilmesi kerek olğan «duşman elementler» olaraq tasvirlene, dep Devletkomteleradio qayd ete.
Bundan da ğayrı, Devletkomteleradio Ukrayinada sabıq KGB agenti, Rusiye pravoslav kilsesiniñ reisi, Moskva patriarhası Volodımır Gundayevniñ «Gözge körüngen sebep ve aqibetlerden tış cenk» adlı yañı kitabını yasaq etti.
Bugünki künde Ukrayinağa qarşı neşirlerniñ cedvelinde 702 propaganda edebiyatı qayd etile.
Hatırlatamız ki, cedvelge kirsetilgen eserlerniñ tarqatıluvı Ukrayina Ceza kodeksinde qayd etilgen cinayet alâmetlerini taşıy bile , — Devletkomteleradide deyler.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
