İşğal etilgen Qırım mektepleriniñ menüleri elektrik teminatınen bağlı meseleler sebebinden deñiştirildi. Çoq vaqıt ve çoq elektrik kerek olğan aşlarnı menüden çıqardılar.
Qırım tasil, ilim ve gençlik naziriniñ muavini Svetlana Bespalovağa atıf etip, RİA «Novosti Krım» bu aqqında haber etti.
«Biz, uzun vaqıt ve çoq elektrik energiyasını talap etken aşlarnı çıqardıq, em de tez bozulğan aşlarnıñ terkibini baqıp çıqtıq», — dep qayd etildi haberde.
Eger sıcaq aş olmasa, dersler qısqartılacaq, balalarğa ise quru aş berilecek.
Hatırlatamız ki, Ukrayina silâlı quvetleriniñ ücümlerinden soñ, Qırımnıñ energetik sisteması küç qıtlığı ve yüksek yüklemeler şaraitlerinde çalışa, dep bildirdi işğalli «Krımenergo».
Yarımadada elektrik teminatı sıñırlavları devam ete.
Hatırlatamız ki, arman ayı devamında İnsansız Sistemalar quvetleri, «MoLoÇKa» operatsiyası çerçivesinde, RF kölge flotınıñ 54 gemisini yoq etti.
Umumen, oraq ayınıñ 6-ndan berli 260 yaldayıcı vastağa zarar ketirildi. «Qırım rubilniki off» operatsiyası çerçivesinde ise arman ayında 168 energiya qavuşağına zarar ketirildi. Oraq ayından berli — 349ğa. İnsansız Sistemalar quvetleriniñ komandanı Robert «Madâr» Brovdi bunı bildirdi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
