Qırımtatar siyasiy mabüsi Tofik Abdulgaziyevniñ Çelâbinskte mahkeme oturışından soñ alı fenalaştı. Onıñ aytqanına köre, aqayınıñ sağ tarafı üyüşti, qol ve ayağı ise alâ daa areket etip olamay. O, Abdulgaziyevniñ mikroinsultı ola bilgini tahmin ete.
Siyasiy mabüsniñ apayı Aliye Facebookta bu aqqında yazdı.
Bir kün evel Çelâbinskniñ Traktor zavodı rayon mahkemesinde Rusiye Federatsiyası Ceza qanunnamesiniñ 297-nci maddesiniñ 2-nci qısmına («mahkemege sayğısızlıq») istinaden Abdulgaziyevge qarşı mahkeme toplaşuvı keçirildi.
Onıñ aytqanına köre, saat 10:00-da siyasiy mabüsni mahkemege ketirdiler. Oturış bitken soñ, onı birden hastahanege alıp ketmediler, amma uzun vaqıt devamında diger mabüslernen beraber avtozakqa mindirdiler.
Qadınnıñ aytqanına köre, şeker hastası olğan Abdulgaziyevnniñ suvu ve quru aşı yoq edi. Onı alıp ketkende, onıñ alı fenalaştı.
«Tilim töküldi ve arqam töküldi. Özümni temizlemege ve tertipke ketirmege küçüm yetmey edi. Yardım istep, qapını qaqtım, başımnı bile urdım. Hadimler, vaziyetim pek yaramay olğanına baqmadan, acele yardım çağırmağa istemediler. Faqat bir mabüs suv şişesini berdi», — dep tarif etti Abdulgaziyevniñ apayı.
Onıñ aytqanına köre, bundan soñ siyasiy mabüsniñ sağ qısmı üyüşti, qol ve ayağı «riayet etmey», mimikası bozuldı. Telefon subeti vaqtında o, da til bozuluvını qayd etti. Onıñ aytqanına köre, adamnıñ mikroinsultı ola bile.
Mahkeme oturışı vaqtında mahkemeci Alöna Zakorçemna Abdulgaziyevni «mahkemege sayğısızlıq» yapqanında qabaatladı ve oña 100 biñ rublelik para cezasını berdi. Prokurornıñ qoşma 400 saatlik işniñ tayin etilmesi talabını mahkeme red etti.
Onıñ aytqanına köre, Abdulgaziyevniñ bir sıra ağır hastalığı bar edi, şu cümleden eki taraflı pnevmoniya, sol taraflı gidrotoraks, anemiya, hronik yürek yetmezligi ve aqılğa zarar ketirgen şişik. Yaqında oña saqat statusı berildi ve o, pensiyağa çıqtı.
Esas cinaiy dava boyunca Tofik Abdulgaziyev 12 yılğa mahküm etildi. Altı yıldır o, Rusiye apishanesinde buluna.
Tofik Abdulgaziev aqqında ne bilemiz
2017 senesi mayıs ayınıñ 4-ünde Tofikniñ evi ilk kere tintildi. O zaman tutulmadı. 2019 senesi saban ayınıñ 27-sinde evi ekinci kere tintilgen soñ Abdulgaziev, Rusiyede yasaqlanğan "Hizb ut-Tahrir" teşkilâtına ait olmağa qabaatlanıp tevqif etildi.
2022 senesi mayıs ayında Rostov-na-Donudaki Cenübiy bölge arbiy makemesi, Tofik Abdugazievğa üküm çıqarıp, sert rejimli müstemlekede 12 senege maküm etti. Müddetniñ ilk beş senesini apishanede keçirmeli.
Bir yoldan soñ 2023 senesi mayıs ayında Vlasıstaki Apellâtsiya makemesi, qorçalayıcı tarafnıñ ükümge şikâyetnamesini baqtı ve ükümini deñiştirmeyip qaldırdı. 2023 senesi oraq ayında Abdulgaziev, RFnıñ Çelâbinsk vilâyetiniñ Verhnöuralsktaki apishanege etap etildi.
Tevqif etilmeden evel Tofik Abdulgaziev, qırım siyasiy mabüslerniñ balaları içün tedbirlerini teşkil etmege yardım etken edi. "Qırım birdemligi" cemaat birleşmesiniñ faalcisi, ses operatorı, "Qırım balalığı" leyhasınıñ iştirakçisi ed. Bundan ğayrı, siyasiy mabüslerge SİZOğa aşayt mahsulatını yollağan, siyasiy sebeplerden açılan davalarnıñ oturışlarını ziyaret etken, vatandaşlarnıñ evileri tintilgende olarnı destek etmege kelgen edi.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
