İlk küz ayınıñ 2-nde saba işğal etilgen Sevastopol (AqyarRusiye imperiyası ve Şuralar Birligi tarafından Qırımnıñ meskün yerleriniñ adlarını deñiştirüv islâatından evelki ad) şeeriniñ Kolobov soqağı yanındaki çölde Mazda maşinası patladı.
ForPost işğalli neşiri, patlav şaatlarına atfı etip, bu aqqında yazdı. Bu malümat derc etilgende, Rusiye quvetçileri onı izaatlamadılar.
«Mışığımnen ve men patlav vaqtında yataqtan uçıp çıqtıq. Bu tahminen saat 6:45 edi. Azbarda telüke sigrnalı çala edi. İnsanlar bir qaç patlav aqqında yazdılar, amma men tek bir patlav eşittim», — dep tarif etti ForPostqa yerli sakinlerden biri.
ForPostnıñ Fevqulâde vaziyetler hızmetindeki menbası, sesniñ sebebi maşnanıñ patlavı olğanını qayd etti. Bundan soñ bölgeni mahsus hızmetler sarıp aldı, bir qaç acele yardım maşnası keldi.
«Qırım yeli» monitoring resursınıñ menbalarına köre, patlav Kolobov soqağındaki No22/3 eviniñ yanında Rusiye arbiy hızmetçisiniñ maşnasında yüz berdi. Bu ve qomşu evlerde Rusiye arbiy hızmetçileri, em de Rusiye Qırımnı işğal etkenine qadar Ukrayina arbiy hızmetçileri olğan insanlar yaşay ediler.
«Adam Mazdanı köçürir-köçürmez, patlav oldı. Cihaz motor bölüginiñ altında buluna edi. Aydayıcı ağır alda hastahanede buluna. Maşnanıñ patlağanınıñ sebebi, 400 gramm trotil miqdarında öz başına yapılğan patlav cihazı oldı. Yerli sakinlerniñ aytqanlarına köre, patlav o qadar küçlü edi ki, onı qomşu soqaqlarda eşite ediler. Menbalarımıznıñ malümatına köre, maşinada daa bir Rusiye askeri patladı», — dep qayd etildi haberde.
«Ateş» arbiy-patrizan areketi, maşnada işğalciniñ bar olğanını bildirdi.
«Gilzi areket Rusiye arbiy hızmetçileri ve Rusiye Silâlı quvetleriniñ gvardiya bölükleriniñ veteranlarını Rusiye gvardiya kününen «hayırladı». Sevastopda (Aqyarda — terciman) Kolobov soqağında maşna patlatıldı. Ve bunıñ kibi şeyler sıq-sıq ola. Hatırlatamız: işğalli ordusda hızmet etmek — ölümge telükelidir. Sizge askerlikke çağıruvname berilgende bunı unutmañız», — dep qayd etildi haberde.
Hatırlatamız, evel Sevastopolnıñ (Aqyarnıñ) Stoletivskıy caddesinde patlav neticesinde Rusiye Mudafaa nazirliginiñ arbiy hadimi elâk oldı. Elâk olğan kişi «Zaporijjâ» ukrayin suvastı qayığınıñ sabıq komandanı Robert Şağeyev ola bilir edi. Açıq menbalardan belli olğanı kibi, 2014 senesi Robert Şageyev antını bozıp, işğalciler tarafına keçti ve Rusiye suvastı gemisiniñ komandanı oldı.
O zaman işğalciler 1994 senesi doğğan Rusiye vatandaşını tuttılar. O, «Rusiye Silâlı quvetleriniñ arbiy hızmetçisine qarşı terakt yapqanında» qabaatlandı. «Mahkeme» onı eki ayğa apiske aldı.
Telegram, WhatsApp, Facebook, TikTok ve YouTubede Suspilne Qırım haberlerine abune oluñız
Bizni Google Haberlerinde oqumaq içün Suspilne Qırımnı saylanğan mevzularda saylañız
